Nuummi politiit sapaatip akunnerata naanerani ulapeqisut
Sapaatip akunnerata naanerani persuttaanerit, aalakkunnerit imminornissamillu sioorasaarinerit atugaapput.
Illumi perulluliornerit 14-it, pisiniarfinni tillinniarnerit arfinillit imminoriarnerillu pingasut.
Sapaatip akunnerata naanerani uani politiit eqqissisaallutik ulappussimapput, julefrokostertoqaqattaarnera allanillu nalliuttorsiortoqarnera pissutigalugit inuit aalakoortut paatsiveqarsimanngimmata.
Arfininngormat ullup qeqqani tappiitsup nalunaarutigaa pulaartimi inissiamit anileramik pattagissani keyboard annissimagaat.
Arfininngornermi ullaap tungaani kingusissukkut angut 39-inik ukiulik tigusarineqarpoq angummik 52-inik ukiulimmik persuttaasimasutut. Persuttaaneq pisimavoq sisamanngornermi, 39-inillu ukiulik siusinnerusukkut pinerluttareersimammat eqqartuussisup aalajangiuppaa angut sapaatip akunnerani ataatsimi tigummigallarneqassasoq.
Arfininngormat ualikkut politiit Brugsenip saavani raajaarniartunik arsaarinnipput. Ulloq taanna siusinnerusukkut kilisaammit raajanik tillinniartoqarsimaneranik nalunaarfigineqarsimapput. Inuit tamatumunnga attuumassuteqartut tillinniarsimasutut unnerluutigineqassapput akiliisinneqarumaarlutillu.
Arfininngormat kingusinnerusukkut politiit sumiiffinni arlalinni aqqusinikkut angallattunik misissuipput. Biilertut arfinillit akiligassinneqarput, imigassartorsimallunili biilertoqarsimanngitsoq politiit nalunaarutigaat.
Sapaatiummat biilertut inuusuttut marluk unitsinneqarput 400-ukkut sukkavallaamik biilersimasutut.
Sapaatiummat ullaakkut arfineq-marlunnut inuit pingasut politeeqarfimmut oqqunneqarput. Tamakkua ullaaralaannguaq illoqarfiup qeqqani immiaaraarniarlutik aningaasarsiniarsimapput. Akiligassinneqarnermik saniatigut immiaaraataannik arsaarneqarput.
Akunnerit marluk qaangiuttut politiit Tuujummi inissiamut qaaqquneqarput, angummik unataaniartumik takkuttoqarsimammat. Politiit takkummata angut anereersimavoq, politiinilli ilisimaneqarluarmat naatsorsuutigineqarpoq qanittukkut tigusarineqassasoq.