Ataatsimoorluni juullisioqatigiinneq
Meeqqat taakkulu ilaqutaat allanik ataatsimooqatigiilluni juullisiorusuttut suliniaqatigiiffiup NANUp Nuummi juullikkunni juullisioqatigiinnissamik aaqqissuussaanut peqataasinnaapput.
Meeqqanut inuusuttunnullu suliniaqatigiiffik NANU juullisoqatigiinnissamut qaaqqusivoq. Aaqqissuussineq Sankt Georgsgildep illuutaani ulluni pingasuni ingerlanneqassaaq - juulliaqqami unnukkut, juullerujussuarmi unnukkut juullillu aappaani.
- Siunertaavoq kikkunnut tamanut nuannersumik juullisiorusuttunut juullisiortitsinissaq. Inuit ilaat akisuallaarnera peqqutigalugu juullisiornissamut akissaqanngillat, Ditte Hammeken NANU-meersoq oqarpoq.
Aaqqissuussineq decembarip 23-iani nalunaaqutaq 14.00 aallartissaaq, peqataasut tamarmik orpimmik pinnersaassallutik, juullisunnitsunik kaagiliorlutik, juullimi mamakujuttutugassanik poortuissallutik juulliaqqamilu unnukkut nerisassat piareersassallugit.
Decembarip 24-iat aallarnerlugu peqataasut juullip inuata pisarneq malillugu Dronning Ingridip Napparsimavissuanut tikinnera isiginnaassavaat. Kingorna naalagiaqatigiittoqassaaq, ualillu sinnerani nuannisartoqassaaq ilaatigut Disneyp juullerpalaartitsinera isiginnaarneqassalluni.
Juulliaqqap unnukkuani nammineq kajumissutsiminnik sulisut juullimi nerisassat piareersassavaat, orpik kaavinneqassalluni meeqqanullu tamanut poortukkanik agguaasoqassalluni.
- Suliffeqarfiit assigiinngitsut aaqqissuussinermut aningaasaliisuullutillu tunissutissanik assigiingitsunik tunissuteqarsimapput, taamalu uagut peqataasut tamarmik nuannersumik juullisiornissaat sapinngisarput tamaat anguniassavarput, Ditte Hammeken oqaluttuarpoq.
Decembarip 25-ani aamma nalunaaqutaq 11.00-imiit 16.00-ip tungaanut assigiinngitsunik sammisassaqarlunilu juullerpalaartitsisoqassaaq. Ilaatigut tamanut nerisitsisoqassaaq, bollertortoqassalluni kissartumillu cacaoeqassalluni.
- Decembarip 25-iat ulloq angajoqqaajusut julefrokosterfigigajuttagaat, taamaattumik meeqqat angerlarsimaffimmi nuannerunnaarpat sumiiffissaqarsinnaassapput, Ditte Hammeken nangippoq.
Aaqqissuussineq nammineq kajumissutsimik sulineruvoq, aamma ullut pingasuusut tamaasa orniguffigisariaqanngillat. Inuit 25-it missaanniittut aaqqissuussinissamut nalunaarsimapput, peqatigiiffiullu suli amerlanerit atorfissaqartissinnaalluarpai, Ditte Hammeken oqarpoq.