Kim K.: Atortut ajortut kinguaattornernut pisuunngillat
Attaveqarnermut Avatangiisinullu Naalakkersuisoq Kim Kielsen mittarfeqarfinni atortut ajoqutillit pillugit oqallinnermut akuliuppoq, atortut ajoqutillit timmisartut kinguaattortarnerinut unitsiinnartarnerinullu pisuutinneqarput.
– Ulluni qaangiuttuni saqqummiunneqartarpoq Nuummi Kangerlussuarmilu sumiissusersiutit localizer-inik taaneqartartut ajoqutillit timmisartut silarluttumi missinnaasarsimannginnerannut peqqutaasut, taamalu timmisartut aallartussaagaluit arlallit kinguartittariaqarnerannik unitsiinnartariaqarnerannillu kinguneqartarsimasoq. Localizer-it tassaapput atortut timmisartut isikkiviluttumi minniartillutik sumiissusersiutigisartagaat.
– Piviusut aallaaviginissaat pingaaruteqarpoq. Localizer-ip silami isikkiviluttumi assersuutigalugu pujortumi timmisartut minniarnerini ikiortarpaat, kisiannili mittarfinni quasattuni anorersuartumiluunniit iluaqutaassuseqarnani, taamaattumi pissusissamisuuginnarpoq Mittarfeqarfiit tassanilu sulisut suliaat piviusut tunngavigalugit nalilersornissaat, Attaveqarnermut Avatangiisinullu Naalakkersuisoq Kim Kielsen tusagassiorfinnut nalunaarummi allappoq.
Naalakkersuisup erseqqissarpaa silaannakkut angallannermi ulapungaarsimanissaq aalajaassuserlu naalakkersuisut assut pingaartikkaat, kisiannili aamma peqatigitillugu Mittarfeqarfiit atortuisa ilaasa pisoqaanerunerat taakkulu kingoraartissarsiniarnerat ajornakusoorsinnaasartoq nassuerutigaat.
– Mittarfeqarfitta ingerlanneqarneri siunissamut qularnaarniarutsigit tassunga tunngatillugu suli salliutitsinissaq pisariaqarpoq. Mittarfeqarfiit kalaallit nunaanni innuttaasunut suliassaq pingaarutilik kisianni ilaatigut ajornakusoorsinnaasoq kivittarpaat, Naalakkersuisunut ilaasortaq Kim Kielsen oqarpoq.
Taamaattumik Naalakkersuisut Mittarfeqarfiillu unamminartoq taanna suliaralugu aallartippaat, angusaqarnissamut isumaqatigiissusiorsimallutik, tassani mittarfeqarfinni ingerlatsineq upalungaarsimanissarlu assut pingaartinneqarluni.