Ivalo Egede KNR-imi pisortanngussaaq

Pisortanngortussaq Roskilde Universitet Centerimiit Tusagassiorfeqarnermut Attaveqaatinullu cand.comm-itut ilinniarsimasuuvoq aammalu kalaallit nunaanni tusagassiorfinnut arlalinnut attuumassuteqartarsimalluni.

KNR-ip siulersuisui tallimanngormat novembarip 21-iani ataatsimiipput, tassanilu Ivalo Egede KNR-ip ingerlanneqarneranut siunissami aqutsisuussasoq aalajangiunneqarpoq.

KNR-ip siulersuisuisa KNR-ip qullersaatut atorfimmut soqutiginninneq taamak annertutigisimammat tupaallaatigisimavaat, qinnuteqartut piukkunnaateqarluartut arlaallit qinigassaasa akornanniissimallutik.

Ivalo Egede Roskilde Universitet Centerimiit Tusagassiutinut Attaveqaatinullu cand.comm.-itut ilinniarsimasuulluni ilaatigut Kalaallit Nunaanni Pinngortitaleriffimmi tusagassiisarnermut tunngasuni Namminersornerullutillu Oqartussani paasissutissiisarnermik sulisimavoq. Ivalop tusagassiorfinnut maannakkut attuumassusai tassaapput Radio aamma TV-mut ataatsimiitsitaliami siulittaasuummat, aammalu Sermitsiap siulersuisuini siulittaasumut tullersortaalluni.

Ivalo Egedep maannakkut Royal Arctic Line A/S-imi nittarsaassinermut pisortatut atorfini qimassavaa KNR-imilu suliassat unamminartut 2009-mi januaarip 1-iani aallartissallugit.

Powered by Labrador CMS