Festivalernissarsuaq sioqqullugu pissanganeq

Nuusiorfiup Atlantic Musicip ukiunik qulinngortorsiornera malunnartinniarlugu sapaatip akunnerata naanerani uani nipilersornermik festivalernissarsuarmut isissutissanik tuniniaaneq ingerlalluarpoq.

Liima Inui nipilersortartorpassuit Nuummi sapaatip akunnerata naanerani appisimaalerpata akornaniissapput.

Atlantic Musicip ukiunik qulinngortorsiornera sapaatip akunnerata naanerani malunnartinniarneqalerpat nalunaaquttap akunnerini 20ini nipilersortoqarnissaa naatsorsuutigineqarpoq, nipilersosrtartoqatigiit assigiinngitsut 20it missaanniitt Kalaallit Nunaata kulturikkut illorsuani Katuami Nuup Timersortarfissuanilu tusarnaartitseqattaalerpata.

– Ullumikkut qasserpiaat pisisimanersut oqaatigisinnaanngikkaluaripput isissutissanik tuniniaaneq ingerlalluarsimavoq, taamak Christian Elsner Atlantic Musicimeersoq sermitsiaq.glimut oqarpoq.

Kisianni Nuummi ulluni kingullerni anorersuartarneranik kinguaattoortitsinernik kinguneqarsimasoq aaqqissuussisunut pissangatitsilersimavoq.

– Kisianni Ole Kristiansen aamma Liima Inui billetisissuppagut ullut marluk sioqqullugit Nuummeereersinnaaniassammata. Angumut Alter Memut tunngatillugu pissanganarnerulaarpoq, taakku Sisimiuni tallimanngorpat unnukkut tusarnaartitsissapput. Nipilersortartut taakku marluk arfininngorpat unnukkut Katuami Nuup Timersortarfissuanilu tusarnaatsitsissapput. Taamaattumik taamanikkissuamut anorip noqqillaamisimanissaa neriuutigaarput, Christian Elsner oqarpoq.

Sermitsiami assiliisartup Leiff Josefsenip Nuup Timersortarfissuani tusarnaartitsinissanut piareersartut alakkarsimavai. Nipilersortartut "Qarsoq" Nuummeersut nipigissaallutik sungiusartut.

Powered by Labrador CMS