Aajuna Nunaga-mi ajugaasoq

assinik unammisitsinermi annertuumi assinik 1.881inik nassitsivigineqarsimasumi Dorthe Ivalo Jensen Sisimiuneersoq nuannaaqisoq ajugaavoq.

Kunngissap Frederiup eqqugassat annersaat marlunngornermi ualikkut Københavnimi Artisk Institutimi Dorthe Ivalo Jensenimut tunniuppaa.

Eqqugassat annersaata ilaatigut imaraa Danmarkimut uninnganertalerlugu angalanissaq.

Assit pitsaanerpaat 12it aamma akissarsiassaqartinneqarput.

Akissarsisut allat tassaapput Lilli Bech Olsen, Kim Eriksen, Ole Jeremiassen, Carsten Lind, Jenseraq Ingemann Olsen, Martin Munck, Marie Rødgaard, Aka Olsen Broberg aamma Karina Bernlow.

Dorthe Ivalo Jensen aamma Kim Eriksen marlunnik akissarsipput.

Naliisut tassaapput: Titartaasartoq grafikerilu Nuka K. Godtfredsen, Folketingimi ilaasortaq Juliane Henningsen, pisortaq Bent Nielsen, Arktisk Institutimeersoq aamma assiliisartut ittuat Per Follver, Politiken.

Assierpassuit tamakku Sermitsiap nittartagaatigut takuneqarsinnaapput.

Assit Arktisk Institutimut tunniunneqassapput, taakku Kalaallit Nunaat pillugu assinik katersaateqarnerpaapput.

Pisortaq Bent Nielsen oqarpoq, nammineq inunnik Kalaallit Nunaannilu ulluinnarni inuunermit assinik amerlanerusumik pissarsinissaq neriuutigisimagaluarini.

Assit unammisitsinermut nassiunneqarsimasut amerlanersaat pinngortitamit assilisaapput, Per Folkverillu maluginiarsimasaatut seqernup tarrilerneranit assilisat amerlaqaat.

Unammisitsinermi unammissutini assigiinngitsuni pingasuni assilisat piumaneqaqqaarsimapput:

1. Uanga ilaquttakkalu

2. Suliffik ilinniagaqarnerlu

3. Sulinngiffeqarneq sunngiffillu

Kisianni ikittunnguaannaat kajumissaarut tamanna malissimavaat.