Kunngissaq nunatsinni assiliisarpoq

– Nunagami unammisitsinerup inernera ajunngilluinnarpoq, taama Kronprins Frederiup ajugaasoq nersualaarpaa. Apersorneqarnera tusarnaarsinnaavat assit isiginnaajutaa.

– Ajugaasup assilisaa ajunngilluinnarpoq, taama kunngissaq Frederik oqarpoq.

Kunngissaq Frederik assinik unammisitsinermi Nunagami illersuisutut ajugaasup marlunngormat akissarsitinnerani najuuppoq.

Dorthe Ivalo Jensen, Sisimiuneersoq unammisitsinermi ajugaasuuvoq.

Kunngissap ajugaasup akissarsiassaa Arktisk Institutimi Københavnimiittumi ajugaasumut isaappaa. Unammisitsineq Arktisk Institutip, Politiken aamma Sermitsiaq suleqatigalugit ingerlappaat. Katillugillu assit 1.881-ut unammisitsinermut nassiunneqarsimapput.

– Assit unammissutaasut ajunngivissutut nalilersinnaavakka, Kunngissaq akissarsiassamik tunniussereerami oqarpoq.

– Assilli taama amerlatigisut akornanni toqqaaniassalluni ajornakusoorsimassaaq, assimmi Kalaallit Nunaanni assilisat kusanartarput, assiliiffiusoq taama ersaritsigimmat. Ajugaasup toqqarneqarnera ajunngilluinnarpoq, taama Kunngissaq oqarpoq.

Kalaallit Nunaanniikkaangavit assiliisarpit?

– Aap ilaana. Kisianni ajoraluartumik ukiut kingullit assilisakippunga. Qimussernersuarmi ukioq 2000-imi ingerlatatsinni assinik ikinngitsunik assiliivunga. Assilisassanik qinaasineq sungiutilertornartarpoq, tappavaniilluni. Assilisassammi nuannersut amerlaqaat. Isigisaq tamaat, panorama, assilineqarsinnaavoq, kisianni uagut qimussersugut eqqarsaatigalugu uumasuutitsinnut – qimmitsinnut qanilaarnerput assilisanni soqutiginarnerusutut taasinnaavara.

Assiutinnik saqqummersitsinissaq eqqarsaatigisimanngiliuk?

– Naagga, taama assiutikka kusanartiginngillat, aamma taama amerlatiginngillat. Assilisakka qimussernersuarmiit qamani qaratsanniinnerupput.

Immaqa nammineq pigisattut isiginnaarujoortarpatit?

– Aap, taama oqartoqarsinnaalluarpoq. Soorunami toqqorsiveeraqarpunga. Isorartoorsuarmik qimussernitta nalaani nunarsuup kusanartorsuup angallaviginerani assilisat, qaratsama iluaniipput nipussimallutik.

Qaqugu Kalaallit Nunaannukaqqissavit – sulimi niviarsiaraq Kalaallit Nunaanni ilisaritinneqanngilaq?

– Eqqorpoq, ilisaritinneqanngilaq. Nuliaralu Christian Isabellallu Kalaallit Nunaannut takornariartikkusuppavut. Takkutissaqqaarpoq. Maannami 18-iinnarnik qaammateqarpoq, kisianni qularinngilara kalaallisuuleruni piuminavissasoq. Kalaallit Nunaannukassaqqaarpugut, taama kunngissaq neriorsuivoq.

Angalajuarputit. Kalaallit Nunaannut angalanissamik pilersaaruteqarpit?

– Uattut Kalaallit Nunaannik asannittuugaanni tappavunga angalanissamik pilersaaruteqalaanngitsoorfiunngilaq. Tamannali siunissamiippoq suli aalajangivinneqarani. Eqqarsaatinniipoq suliassatut inissisimalluni. Angalanermik misigisassaq imminut tuniussassaq. Aap, Kalaallit Nunaannut misigisassasiornermik pilersaarusiortuaannarpunga, taama kunngissaq oqarpoq.

Powered by Labrador CMS