MIPI kinguarsarneqaqqippoq

Naalakkersuisut aalajangeruminaatsinnguatsiarpaat meeqqanik inuusuttunillu ilisimasaqarfik MIPI qanoq pineqassanersoq.

Tassami ilaqutariinnermut peqqissutsimullu naalakkersuisup Aqqalu Abelsenip, Atassut, suleqatigiissitaliap, upernaaq inatsisartut ataatsimiinneranni aalajangiiffigisassatut siunnersuummut atatillugu nammineq pilersitami, inassuteqaatai malinniannginnguatsiarpai.

Suleqatigiissitaliap ilaatigut inassuteqaatigaa ilisimasaqarfimmi pisortamik atorfinitsitsisoqassasoq sulisullu atorfii qaffanneqassasut. Tamatuma saniatigut MIPI Ilimmarfimmiitinniarpaa siunissamilu suliassai tassaatinniarlugit ilisimasanik pilersitsinissaq, meeqqat inuusuttullu pillugit ilisimasanik katersuiinnarani.

Aqqalu Abelsenili atorfilittaalu isumaqarput suleqatigiissitaliap siunnersuutai akisuvallaartut nalorninartoqarpallaarlutillu.

Taarsiullugu naalakkersuisut isumaliutigaat suleqatigiissitaliamik nutaamik pilersitsinissaq, taassuma annertunerusumik pilersaarusiussallugu »isumaginninnermik misissuinermi tamarmi ataatsimut aaqqissuussaasumillu suliniuteqartoqarnissaa«.

Pilersaarutillu tamassuma saqqummiunneqarnissaata tungaanut MIPI-p siunissami inissisimaffissaa aaqqissuunneqarnissaalu isummerfigineqassanngillat, Aqqalu Abelsen ilaqutariinnermut ataatsimiititaliamut allakkamini allappoq, ataatsimiititaliallu taassuma MIPI-p siunissami qanoq inissisimanissaanik aalajangiivigisassatut siunnersuut aappassaanik oqaluusereqqammerpaa.

Sermitsiaq nutaaq atuaruk.