Skip to main content

Juullip Nipitittagaa akisunerulersinnaavoq

Juullip Nipitittagai pisiarineqartartut ikiliartorput, tamanna pissutaallunni imaassinnaavoq nipitittakkap akiata qaffanneqarnissaa pisariaqassasoq

Amerlasuut peqataapput kalaallit juullimi nipitittagaata ukioq manna saqqummersinneqarnerata Københavnimi Kalaallit Illuutaanni malunnartinniarnerani. Tunineqartartulli ikiliartorput kingunerisinnaavaalu akiata qaffanneqarneranik, soorlu Danmarkimi tapersuisut taamatut siunnersuuteqartut 

Juullip Nipitittagaata akia ukiuni kingullerni tallimani taamaaginnarpoq, tassa 40 kruunit arkimut. Isertitat amerlanerulernissaat taamaalillunilu kalaallit eqqumiitsuliaannut kulturiannullu tapersiisarnerup annertunerulernissaa anguniarlugu Danmarkimi tapersersuisut – Støtteudvalget i Danmark – Juullip Nipitittagaata Aningaasaateqarfianut atasoq – akiata qaffanneqarnissaa siunnersuutigaat.

Ukiut tamaasa pisartoq Juullip Nipitittagaata saqqummersinneqarnera Københavnimi Kalaallit Illuutaanni malunnartinniarneqarpoq ippassaq tallimanngornermi inuit qaaqqusat 120-t peqataanerisigut.

Kristen Poulsenip taalliaa nuannersoq ’Ukiap seqerna pukkilisoq’ erinarsoqatigiinnit Mik-ikkunnit aallarniutigineqareermat Juullip Nipitittagaata Danmarkimi tapersersuisuisa  nipitittagaq ukiut tamaasa saqqummersinneqartartoq taamaalillugu saqqummiussinnaanngorpaat.

Ukioq manna Juullip Nipitittagaa 35-ssaanik saqqummersinneqarpoq. Ukiunilu kingullerni tunineqarnera appariartorsimagaluartoq, taamaattoq Danmarkimi tapersersuisut sulinerat annikillisimanngilaq.

Nipittagaq emailini

Danmarkimi nalinginnaasumik tunineqarnera 2005-imut 252.000 koruunit isertitsiffiusimavoq. 2006-imullu tunngatillugu tamanna 240.000 koruuninut appariarsimavoq siornalu isertinneqartut suli 40.000 koruuninik ikinnerullutik. Tunisaqartarneq ataatsimut isigalugu, Nunatsinni tunisaqartarneq aalajangersimasullu pisartagaqartoqarnera eqqarsaatigalugu, tamarmik appariartorsimapput. Tamatumunnga patsisit ilagisinnaavaat allanik nipitittakkanik Juullip Nipittagaanut unammillertunik saqqummersitsisartut amerligaluttuinnarnerat, aamma amerligaluttuinnartut juullimi pilluaqqussutiminnik e-mailikkut nassitsisarnerat.

- Akit qaffakkiartuinnarsimagaluartut taamaattoq ukiuni kingullerni tallimani nipitittakkap akia qaffassimanngilarput, Danmarkimi tapersersuisut siulittaasuat Morten Jørch oqarpoq. 

- Taamaattumik imaassinnaavoq aappaagumiit Juullip Nipitittagaata Aningaasaateqarfiata akia qaffakkaat, Morten Jørch oqarpoq eqqaallugulu tapersersuisut qanittukkut taamatut siunnersuuteqarsimasut

Alla periarfissaq tassaasinnaavoq computer atorlugu e-mailinik nassitsinermi atugassanik nipitittakkanik tuniniaasalernissaq.

- Amerlaqisut juullimi pilluaqqussutinik e-mailinik nassitsisarput, taamaalilluta taamatut taakkununnga tuniniaasalersinnaaneq periarfissaavoq. Danskit juullimi meqqiata taamatut tuniniarneqartarnera iluatsissimavoq, Morten Jørch ukiuni kingullerni tallimani tapersersuisuni siulittaasuusimasoq ukiullu qulit missaanni tapersersuisuni suleqataasimasoq naggasiivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER