Vittus Mikaelsen akileraarutinik sorsuutiginnippoq
Tasiilap Kommuneani borgmesteri inatsisartunullu ilaasortaq Vittus Mikaelsen akileraarutinut tunngasumi sivisuumik ingerlasimasumi iluatsitsivoq, taamatut allappoq knr.gl.
Nuummi Nunatta Eqqartuussivia ippassaq aalajangiivoq Vittus Mikaelsenip 2001-imi akileraarutinut akiligassat taamaallaat akilissagai, ukiunut siuliinut tunngatillugu Skatterådip piumasaqaatai pisoqalivallaarsimasutut oqaatigineqarlutik.
Borgmesteri eqqartuunneqarpoq ukiumi ataasiinnarmi akileraarutinut akiliinikippallaarsimanerit akilissagai, sulilu ukiunut tallimanut akiliisinniarneqarnerigaluani pinngitsuutinneqarluni. Tamatumani pineqarput akileraarutinut immikkut akiligassat 370.000 koruunit.
Vittus Mikaeæsen nulialu ukiorpassuarni akileraarutinut akiliisimavallaarnernit ukiumut 50.000 koruuninik utertitsiffigineqartarsimapput. 2002-mili akileraartarnermi pisortaqarfimmit 370.000 koruuninik akiligassinneqarput ullut 14-it qaangiutsinnagit akilerneqartussanik.
Akiligassiinermut pissutaavoq Skatterådi isumaqarmat Vittus Mikaelsen ukiorpassuarni isertitaqartarsimasoq akileraaruseriffimmut nalunaarutigineqarneq ajortunik. Ilaatigut akeqanngilluinnartumik angallatit marluk qatanngutiminut angummut ikinngumminullu tunniussimavai, aammalu angallammik attartortitsilluni angalatitsisarsimalluni, akileraaruseriffiup isumaqarfigisaanik akileraaruseriffimmut nalunaarutigisaanit aningaasarsiorneruffigisarsimasaminik.
- Suliassaq Kalaallit Nunaata Eqqartuussivianut tunniussimavara, pissutigalugu isertitannik naliliinerat isumaqatiginnginnakku, Vittus Mikaelsen ippassaq Radioavisimut oqarpoq.
- Suliap naammassineqarnera iluarsimaartorujussuuvara oqiliallaatigalugulu kiisami aalajangiiffigineqarmat. Suliarmi ukiuni arfinilinni ingerlasimavoq, suliassaq 2002-mi aallartitissimagakku, Vittus Mikaelsen ippassaq eqqartuussineq naammassimmat oqarpoq.
Vittus Mikaelsen Tasiilami borgmesteriuvoq, inatsisartunut ilaasortaalluni piniartuulluinlu. Angallammik attartortitsilluni angallassineq sunngiffimmi sammisatut isigaa.