Tussiutit kalaallisuut nutaat

Sapaatiuppat oktobarip 5iani 2008mi tussiutit kalaallisuut nutaat saqqummersinneqassapput, taakkulu aatsaavissuaq Kunngukkormiutut Ataqqinassusilimmit Dronning Margrethe aappaannit naqissusersimassallutik.

Tussiutit nutaat saqqummersinneqarnerannut atatillugu Nuummi nalliuttorsiorpalaartumik nal. 10.00 naalagiaqatigiittoqassaaq, illoqarfimmi palasit, ilagiit sinniisaasa affaat aammalu tussiutinut saqqummersunut ataatsimiitsitaliaq kingullerpaaq saqqummersitsinermi tunuliaqutaasoq ingerlaaqatigiissapput. Nalliuttorsiorpalaartumik naalagiaqatigiinnermi Kujataata provstia Johanne Kyed oqaluussisuussaaq.

Peqatigitillugu saqqummersitsineq Annaassisitta Oqaluffiani aamma nalliuttorsiutigineqassaaq, tassani Nuummi ilaagiit sinniisaasa affaat peqataassapput. Tassani Nuummi palasi Emilie Steenholdt naalagiartitsisuussaaq.

Nuummi ilagiit sinniisaat nal. 14.00-imiit Hans Egedep Oqaluffiata ilagiit sinniisaasa ataatsimiittarfiani tamanut ammasumik kaffillissapput.

Tussiutit nutaat aamma nunap sinnerani ullormi nalliuttorsiutigineqassapput, sumiiffimmini ataasiakkaani pisoqartitsissalluni.

Tussiutit nutaat pillugit allaaserisat aamma Sermitsiami tallimanngormat saqqummerpat atuakkit.

Powered by Labrador CMS