Skip to main content

Grønlandsbankenip sullitani qulakkeeruserpai

Akerlianik aktiaatillit ukiuni tulliuttuni marlunni agguagarsissanngillat.

Ukiunik marlunnik atuuttumut sullitat aningaasaataasa uninngasuutigisaannut qularnaveeqqusiinermut Grønlandsbanken ilannguppoq.

Ilimagineqanngilluinnaraluartutut Roskilde Bank assigalugu Grønlandsbanken akiliisinnaajunnaassagaluarpat qularnaveeqqusiinerup, sullitat uninngasuutaat qanorluunniit amerlatigigaluarpata, matussusissavaat.

Grønlandsbankenip sullitai 60.000-iusut aningaaseriviup 2008-mi ukiup affaanut naatsorsuutai malillugit 3,3 milliardit koruuninik uninngasuuteqarput.

Danskit naalakkersuisui kiisalu danskit aningaaserivii tassaapput sapaatiummat unnukkut bank-pakke pillugu isumaqatigiissuteqartut, tamatumani siunertarineqarpoq ukiut qulikkaat ingerlaneranni aningaasarsiornikkut ajornartorsiornermik unikaallatsitsinissaq.

Isumaqatigiissutip kingunerisaanik aningaasanik uninngasuutillit sillimmaserneqarnerat 300.000 koruuninut killeqartoq killeqanngitsumik uninngasuutit qanoq amerlatiginerat apeqqutaatinnagu sillimmasiinermik taarserneqarpoq. Tamannalu pissutigalugu sullitat aningaaserivinnit ajornartorsiortunit aningaasaatiminnik allanut nuussisariaarutissapput, aningaasammi uninngasuutit allanut nuussorneqaleraluarpata aningaaseriviit ajornartorsioreersut suli annerusumik eqqorneqassagaluarmata.

Aningaaseriviit koruunit 35 milliardit qulakkeerinermut akiliutigissavaat, naalagaaffiullu annaasat koruuninik 35 milliardinik amerlanerusut matussusissavai.

Aningaaseriviit qularnaveeqqusiinerannut koruuninut 35 milliardinut akiliutigisaat qanoq angitiginerat apeqqutaatillugu annertussusiligaavoq, Grønlandsbankenillu ukiuni tulliuttuni marlunni aningaasaliissutissai 26 milionit koruuniussapput.

Tamatumunnga tunngatillugu naalagaaffik piumasaqarsimavoq ukiuni tulliuttuni marlunni aningaaseriviit aktiaatilinnut agguagarsititsinnginnissaannik.

Grønlandsbankenimi aktiatigut piginneqataassutit 180 millionit koruuninik amerlassuseqarput, aktiaatillillu pingaarnerit tassaapput Danske Andelskassers Bank 14,58 %, Savalimmiuni Tryggingarfelagid 14,58 %, Namminersornerullutik Oqartussat 13,70%, Nuna Fonden 13,33% aamma Sparinvest 10,73 %.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER