Inngili Qernertoq suli avatangiisinut ajornartorsiutaavoq

Tamanna Danmarks Miljøundersøgelser-ip (DMU) Aarhus Universtitetimiittup sumiiffimmik nakkutiginnittuusup nalunaarusiaani dmu.dk-miittumi takuneqarsinnaavoq. Nakkutiginninneq Namminersornerullutik Oqartussat aatsitassanut pisortaqarfiata aningaasalersugaraa.

Maamorillip eqqaani kangerluit ukiuni arlinni misissorneqartarsimaput kinnerit, uumasut naasullu aqerlumik zinkimillu akoqarnersut misissorneqartarsimallutik. Nalunaarusiami »Environment monotoring of the lead-zinc mine in Maamorilik, Northwest Greenland, 2007-imi 2007-imi misissuinerit inerneri siusinnerusukkut misissuinerusarsimasut inernerisartagaannut sanilliunneqarsimapput.

1990-imi aatsitassamik piiaasoqarunnaarnerata kingorna immamik mingutsitsineq annikillisorujussuusimavoq. Massakkullu kangerluup Affarlikassaata naqqani taamaallaat annikitsuinnarmik aqerlumik aniasoqarpoq, aatsitassamilli piiaasoqaraallarmat ingasannerujussuusimagaluarluni. Kangerluup naqqata imartaa 2007-imi tusinteriaammik aqerlulinnerulersimavoq 1998-1998-imullu sanilliullugu arfinileriaammik zinkeqannginnerulersimalluni.

Aqerlup akugineqartup annertussusia ilaatigut nunaqavissut tamaani aalisakkanik qaleruanillu nerisaqartartut isumakulunnartippaat. 2007-imi takuneqarsinnaavoq aqerlumik akoqassuseq killissarititaasut ataanniilersimasoq taamaallaat kangerluit Affarlikassaa Qaamarujuullu kitaa pinnagit. Taakkunani suli uilortarnissaq inerteqqutaavoq.

Aatsitassarsioqatigiiffik »Black Angel Mining Ltd." pilersaarutit malillugit 2009-imi Maamorilimmi aatsitassarsioqqilertussaavoq. Aatsitassarsioqatigiiffik periutsinik 1973-imiit 1990-imut atorneqarlutik mingutsitsissutaasimasunik atuissannginnerarpoq. Taamaattumillu qangatut mingutsitsisoqaqqinnissaa ilimagineqanngilaq. Aatsitassarsiulersussalli ilaatigut pujoralak aqqutigalugu mingutsitsinaveersaarnissat piumasarineqarumaarpoq, dmu.dk allappoq.

.