Qaanaami politiinut qaammat ulapaarfik

Qaammammi augustimi Qaanaami politiinut saaffiginnissutit imigassamut attuumassuteqartut 50-iusimapput.

Qaanaami politiinit kisitsisit nutaajunerpaat takutippaat, qaammat august ulapaarfiusimaqisoq. Siorna imigassap matuneqarnerata siornatigut kingornatigullu kisitsisinut sanilliullugit kisitsit takutippaat, politinut saaffiginninnerit imigassamut attuumassuteqartut imigassap matuneqarnerata siornatigornit amerleriarsimasut.

Siorna Qaanami imigassamik tunininaaneq tamarmi piffissami majip 10-anniit junip 20-iannut matuneqarpoq, Karen Littauerip Qaanaami imernerujussuaq, tupassutigisimaqisani,qallunaat tusagassiorfiinut oqaluttuarereeraalu.

– Tamanna qangaluunniit takusimasama ajornersaraat. Illoqarfimmiut imertorujussuupput snapsilu imerneqarnersaavoq, Karen Littauer taamanikkut DR-imut oqarpoq.

Tamatuma kingorna naalakkersuisut aalajangerput Qaanaami imigassamik tuniniaaneq matuneqassasoq, tuniniaanerlu ammaqqinneqarmat taamaallaat immiaaqqat viinnillu pisiarineqarsinnaapput, tamannalu ullumikkut suli atuuppoq.

Imigassap matuneqarneranut atatillugu naalakkersuisut aamma Qaanaaq Komite-liorput, piffissaq qaninnerusoq ungasinnerusorlu isigalugit, siunertaralugu ilaqutariinni inuunerup pitsaanerusup, inuunermi pitsaassutsinik peqqinnartunik pitsaasunillu imallip, pilersinneqarnissaa attatiinnarneqarnissaalu. Komitep suliani aallartimmaguli ilaqutariinnut højskolinik ingerlatsisoqartarsimavoq, tarnip pissusianik ilisimasalinnik tikeraartoqartarsimavoq, aammalu kommunimi isumaginninnermik ingerlatsivimmi assigiinngitsunik pikkorissartitsisoqartarsimalluni. Aamma Qaqiffik assigiinngitsunik imigassamut katsorsaasarsimavoq, imigassartaqanngitsunik aaqqissuussisoqartarpoq, meeqqat atuarfianni atuartunut akullernut fritidsklubimik pilersitsisoqarsimavoq, taavalu atuarfimmi nerisitsisoqartalersimavoq.

– Kisitsisit isummerfiginissaat ajornakusoorpoq, piffinnut assigiinngitsunut innersuussimmata. Naluara ukioq manna qaammammut augustimut kisitsit 50 2006-imi 2007-imilu qaammammit augustimut qaffasinnerunersoq. Komite sisamanngornermi septemberip 25-ianni katersuutissaaq, tamatumanilu qulakkiissavara ilaasortat kisitsisit taakkua pissagaat. Uanga nammineq inuttut pingaartippara komitep ataani suliniutit aallartinneqarsimasut pitsaasumik pimoorussamillu nalilerneqassasut, tamatumalu aamma kingunerissavaa kisitsisinik sanilliunneqarsinnaasunik politiinit piniarnissaq, Qaanaaq Komitemi ataqatigiissaarisoq Bodil Karlshøj oqarpoq, ilanngullugulu oqaatigalugu komitep suliani 2008-p naalernerani nalilersussagai.

Qaanaaq Komitemut aningaasanut inatsimmit 2,1 mio. kr.-nit aningaasaliissutigineqarsimapput.

Qaanaaq 846-nik inoqarpoq.

11. maj - 11. juni 2006

1. april - 10. maj 2007

11. maj - 11- juni 2007

1. aug. - 1- sept. 2008

Saaffiginninnerit imigassamut attuumassutillit

41

31

5

50

Taakkunannga illumi perulluliornerit

15

8

2

17

Taakkunannga aserorterinerit

3

2

0

0

Taakkunannga aalakoortut

17

13

3

17

Taakkunannga kinguaass. kanngunartuliornerit

1

1

0

3

Taakkunannga imminornissamik sioorasaarinerit

2

3

0

2

Taakkunannga aqqusinermi perull./nakuusernerit

2

2

0

6

Taakkunannga isumaginninnermut tunngasut

0

2

0

7

Paasisaqarfik: Politimestereqarfik aamma Qaanaaq politi.

Powered by Labrador CMS