Angerlarsilersut

Kalaallit Illuutaannut sianeqattaarnerup takutippaa kalaallit illuutaasa tamarmik atuartut ataaseq pingasulluunniit sapaatip akunnera ataaseq ingerlariiginnartoq anglerlartissimagaat. Peqqutaanerpaaq tassaavoq angerlarserneq illuutiniit nassuiaatigineqarpoq.

- Imaassinnaavoq Kalaallit Nunaanni asasaqarneq imaluunniit nipiliornersuaq sungiunniagassallu nutaat sakkortuumik misigineqarsimasut, ilinniartitaanermut siunnersorti Marianne B. Jensen Odensemi Kalaallit Illuutaanneersoq region Syddanmarkimi isumaginnittuusoq oqarpoq.

Taassuma ilisimatitsissutigaa, namminneq atuartut maannamut pingasuugallartut aingerlartittariaqarsimallugit.

Aalborgimi Region Nordjyllandimi suleqataata Jonathan Johnsenip maannamut atuartoq ataaseq atuarfimmi ullut marluk atuareerluni angerlarusuttoq angerlartissimavaa. Angerlarserneq atuartumut anaanaminit Danmarkimut ingiallorneqarsimasumut sakkortuallaarsimavoq, Jonathan Johnsen nassuiaavoq.

- Ullut marluk ingerlariiginnartut siusippallaangajappoq, nalinginnaasumik sapaatit akunneri marluk ingerlaneranni takoqqaartaraluarpagut, ilinniartitaanermut siunnersorti oqarpoq.

Ajornartorsiut annertooq
Århusimi illuutip atuartut marluk angerlartissimavai. Taakku saniatigut atuartut arfinillit saaffiginnissimapput Kalaallit Nunaannut angerlaannarusunnerulersimallutik oqarlutik. Region Midtjyllandi ukioq manna 125-inik efterskolemiittuuteqarppoq, siorna 70-iusimallutik.

- Ataatsimut isigalugu ajornartorsiut annertuujuvoq. Kisianni atuartut misileeqqaarnissaannik periarfissillugit oqaluuttartagut, isumaginninnermut siunnersorti Simon Lynge Århusimi Kalaallit Illuutaaneersoq oqarpoq.

Taasuma oqaatigisinnaasoraa, inuusuttut sumut aallarnerlutik erseqqissumik paaseqqissaartarsimagunanngikkaat.

- Immaqa angajoqqaavisa taamaalioqqusimammatik pisussat iluamik iserfigisinnaasarsimanngilaat. Taamak oqaluttuuttarpaatigut, Simon Lynge oqarpoq.

Region Sjællanidimiit ilinniartitaanermut siunnersortip Pia Rosing Heilmannip Københavnimi Kalaallit Illuutaaneersup ilisimatitsissutigaa, atuartut marluk angerlartissimallugit, taakkunani uninngaannarnissamik oqaloqatiginninnerit ajornavissimallutik.

Danmarkimut ukioq manna efterskoleriartinneqartut katillugit 481-iusimapput, imaluunniit siornamut sanilliullugu marloriaataat, taamak Oqaatsinik Pikkorissarfiup pisortaa Johan Meyer ilisimatitsivoq. Ilinniarfik taanna efterskolertitsisarnermi aaqqissuussisartuuvoq. Johan Meyerip Kalaallit Illuutaat nersialaarpai, ukioq manna atuartorpassuarnik piffissani assigiinngitsorpassuarni Danmarkimut tikiussuussimasunik isumaginninnerannik.

– Ukioq manna assorsuaq upalaarfiusimavoq, kisianni Illuutit pikkorissimapput, qujanartumillu ilaqutariit attaveqaataasussat ilarpassuisa inuusuttut Danmarkimut tikinneranni aasarsinnaasimavaat, Johan Meyer oqarpoq.

Taassuma atuartut amerlangaatsiaraluartut neriuutigaa siornamut sanilliullugu ukioq manna atuartut ikinnerusut uniinnannginnissaat. Siorna efterskolemi atuartut 11,8 procentii atuarneq naammassinngitsoq Kalaallit Nunaannut angerlaannarput, Johan Meyer ilisimatitsivoq.