Skip to main content

Istak-ip quersua sannavialu assut ikuallattoq

Assit nutaat. Atortussamaatit, maskiinat sarfaliuutillu millionerpassuarnik nalillit tallimanngornermi ullaakkut ikuallannermit suujunnaarsinneqarput, Sisimiut avannaani Kangerluarsuk Ungallermi erngup nukinganik nukissorfimmi Ístak campi ikuallammat.

- Annilaarsimavugut kisianni makitavugut siumullu isigaluta, taamak sanaartorfimmi pisortaq Gudmundur Thordarson oqarpoq, tallimanngormat ullaaralaakkut islandimiut entreprenøriata Ístak-ip quersua sannavialu ikuallammat. Innaallagissiorfiit, sannaviit atortussamaaterpassuarnik maskinnanillu imallit aamma potorsualiornermi atortunut tamanut sillimmatissamaatit ikuallannermit aserorneqarput.

- Taamaakkaluartoq iluatsilluartumik inunnik ajoqusertoqanngilaq, Gudmudur oqarpoq.

Ístaki qujanartumik allatigut ataasiinnartigut ikuallannermit eqqorneqanngilaq. Anori maskiinarsuit arlallit quersuup silataaniittut tungaanut anorlinngimmat taakku angunngitsoorpai. Aamma taamaappoq tankersuaq ikummatissamik 30.000 liiterinik campimi ulluinnarni atugassanik imalik.

Upalungaarsimanissamut pilersaarut ikuallattoqartillugu siullerpaatut gasflaskit peeerneqarnissaannik maleruagassaq malinneqanngilaq.

- Taamaaliornissamut inneq sakkortuallaarpoq, innermut taamak sakkortutigisumut inunnik pallinngoortitsinissaq ulorianarpallaaqaaq, Thordarson oqarpoq. Taanna eqqaassanngikkaanni sinneri tamarmik eqqortinneqarput. Inuit itersarneqarlutik aniatinneqarput, sannaviullu eqqaaniittut amerlanersaat piiarlugit.

Inneq innaallagissiuutit pingasuusut qiterlersaanni campimut putorsuarmullu innaallagissamik pilersuisumi aallartissimagunarpoq. Unnuarsiortut betonimik putorsuarmut immiillutik aallarteruttorsimapput, taamalu putorsuarmi sulisut ilaat ullaaralaaq 5-t missaanni sannavimmut qillerutip nuussaanik aallersimavoq. Matu ammaramiuk suna tamarmi qernertuinnaasoq pujoqisorlu takusimavaa. Matu matupallappaa. Minuttit 20-iunngitsulluunniit inneq qaliaatigut naarallattalereerpoq, annermik innaallagissiuutit nalaanni.

Ikuallannermut peqqutaasoq ilisimaneqanngilaq
Ikuallannermut peqqutaasoq ilisimaneqanngilaq, kisianni Thordarson isumaqarpoq innaallagissiuutit ilaanni ataatsip motorianiissasoq. Sisimiuniit qatserisartut tallimanngornermi ullaakkut ikuallatumik suli qamitereqqissaarput. Ullaap tungaata ingerlanerani campimi sulisut inaannut igaffianullu innaallagiaq attavileqqinneqarpoq.

Gudmundur Thordarson isumaqarpoq ikuallanneq erngup nukinganik nukissiorfiup 2010-mi maajimi atoqqaartinneqarnissaanut kinguaattoorutaassanngitsoq.

- Putorsuup iluani nukissiorfissartaviani sulinerput ingerlatiinnassavarput, kisianni Tasersuup eqqaani qillerinissat utaqqisikkallassavagut. Atortussat atortunullu sillimmatissat qaammatit pingasut utaqqisussaavagut. Taamaalinerani ukiuuteriissavaatigut, taamalu putorsualiornerup suliassartaata sinnera immaqa upernaamut kinguartittariaqalissavarput, Thordarson oqarpoq. Tamanna tunngavigalugu slovakiamiut 22-it putorsuarmi qillerinermik suliaqartut tallimanngornermi Slovakiamut angerlartinneqareerput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER