Skip to main content

Tallimanngornermi ualikkut umiarsuaq pulaarneqarsinnaavoq

"Ejnar Mikkelsen" Nuummut tikippoq, illoqarfimmilu innuttaasut qaaqquneqarput umiarsuarmik takuniaanissaminnut.

Umiarsuaq alapernaarsuut sananeqaqqammersoq "Ejnar Mikkelsen" tallimanngormat ullaap tungaani Nuummut tikippoq. Umiarsuaq "Knud Rasmussen"-ip aapparaa, taamaasillunilu umiarsuaaqqat alapernaarsuutit pisoqaanerpaat ilaat marluk umiarsuarnik nutaaliaalluinnartunik taarserneqarput.

- 1970-ikkut aallartinneranni umiarsuaaqqat alapernaarsuutit sananeqarmata, umiarsuaaqqat tamakkua maani aalisarnermik nakkutilliinermut naapertuussimapput. Taamanikkut umiarsuit aalisariutit anginerusimanngillat. Ullumikkut umiarsuit aalisarnermi atorneqartut anginerupput, aalisarnermullu killeqarfik 200 sømilinut annertusineqarsimavoq, taamaattumik avasinnerusuliarnissatsinnut pisariaqartitsivugut, "Ejnar Mikkelsen"-ip naalagaa, kaptajnløjtnant Troels Sundwall oqarpoq.

Umiarsuaq alapernaarsuut helikopterimut mittarfeqarpoq immikkullu ittumik angallammik annanniuteqarluni, umiarsuup iluaniittumik, kinguatigut portikkut singinneqarsinnaasumik. Angallat annanniut atserneqarsimavoq "Naja", Ejnar Mikkelsenip ernutaa atsiullugu.

- Angallat annanniut kangerlunni ujaasinernut naatsorsuussaavoq, aammattaarli assartuinernut aammalu umiarsuup tikissinnaanngisaanut ornigutissatut, Troels Sundwall Sermitsiaq.gl-imut oqaluttuarpoq.

Aasaanerani umiarsuit takornariartaatit amerlanerusut tikittalermata tamanna annertunerusumik suliassaqartitsilereerpoq, siunissamilu Nordvestpassagenip angalaffigineqarsinnaalernera amerlanerujussuarnik umiarsuaqartitsisalissaaq, tamannalu peqatigalugu uuliasioqartoqalissappat tamanna annertunerusumik nakkutilliinissamik ikiuisarnissamillu pisariaqartitsissaaq.

Umiarsuaq alapernaarsuut nutaaq umiarsuaaqqanit alapernaarsuutaasimasunit, 14-inik inuttaqartarsumasunit, marloriaammik angineruvoq. Umiarsuaq nutaaq 19-inik inuttaqarpoq, sapaatiuppallu "Ejnar Mikkelsen" alapernaarsuiartorluni aallassaaq.

- Taava suliassavut aallartissavagut: aalisarnermik nakkutilliineq, oqartussaassuseqarnermik atortitsineq, immanik nakkutilliineq, sikunik aserorterineq, napparsimasunik assartuineq, Kangilinnguani Sakkutooqarfimmi suliassat immikkut ittut. Suliassarpassuaqarpugut, Troels Sundwall naggasiivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER