Nuuk qaasuitsoq pillugu isumasioqatigiinnissarsuarmi illoqarfiussaaq
issittumi pissutsit pillugit isumasioqatigiinnerit maannamut annersaanni aggutsip naaneranni pisussami politikerit nutaanik ilisimasaqalerlutillu paasisimasaqalissapput.
Ilisimatuussutsikkut inuiaqatigiilerineq pillugu isumasioqatigiinnissaq Nuummi aggutsip 22-ianiit 26-ianut ingerlanneqartussaq 300-t 400-llu akornannit peqataaffigineqassaaq. Oqallinnissamut saqqummiinerit Ilimmarfimmi Katuamilu ingerlanneqassapput.
Aaqqissueqataasoq Birger Poppel ICASS-imi (international Congress af Arctic Socila Science) vicepræsidentiusoq naapertorlugu oqallinnissamut saqqumiussassat amerlanersaat nungusaataanngissusermut silaannaallu allanngoriartornerannut tunngasuupput.
– Tamatuma takutippaa nunarsuup kissatsikkiartornera inuiaqatigiilerinermik ilisimatut aamma soqutigigaat; Birger Poppel oqarpoq. Taassuma aamma neriuutigaa, isumasioqatigiinnerup nalaani politikerit aamma malinnaasunut ilaajumaartut.
– Aamma inuuniarnermut kultuirimullu tunngasuni ilisimasanik nutaaqassaaq, taamaattumik neriuutigaara politikeritta isumasioqatigiinnermut malinnaanissamut piffissaqassasut, Birge Poppel oqarpoq.
Taassuma aamma ilisimatitsissutigaa peqataasussat Kalaallit Nunaata avataaneersut inissaqartinniarnerat assut ajornakusoorsimasoq. Isumasioqatigiinnissap nalaani init siniffiusinnaasut tamarmik ulikkaarput. Hotel Hans Egede, Sømandshjemmet, Nordbo,Centerbo aamma unnuisarfiit »Bed and Breakfast«-it assigiinngitsut.
Sisamanngorpat tusagassiorfinnut katersortitsisoqassaaq, tassani peqataasussat amerlassusissarpiaat saqqummiunneqassallutik, Birger Poppel ilisimatitsivoq.