Uran-imik piiaanissaq Aqqaluk Lynge’p akerleraa
Kalaallit Nunaanni ICC-mut siulittaasoq isumaqanngilaq, Kalaalit Nunaata uranimik piiaanissaq akuerisariaqaraa. Aamma saniatigut atortussanik tunisissiornermi atorneqassagaluarpat.
– Uran-imik piiaaneq kikkunnulluunniit silatusaarnerusorinngilara. Sooq piiassavarput pinngortitaq innuttaasullu peqqissusiat ajoqusersorlugit, Aqqaluk Lynger marlunngornermi CBS News-imi allaaserisami oqarpoq.
Nunatsinni ICC-mut siulittaasup erseqqissaatigaa, ukiut 20-t missaanni Folketingimi Inatsisartunilu uran-imik piiaanissap inerteqqutigineqarnissaa aalajangerneqartoq tunngavigalugu tunngaviusumik oqaaseqarluni. Isumaqarporli inerteqquteqarneq suli atuuttariaqartoq, aamma uran saniatigut tunisassiornerni atorneqarnissaa eqqarsaatigalugu.
Aqqaluk Lynge’p erseqqissaatigaa Issittumi tamarmi pisuussutinik ujaasineq sakkortusigaluttuinnartut peqqutigalugu Kalaallit Nunaat tinnersaarneqangaatsiartoq. Aningaasarsiupallannissamik eqqarsaateqarnermi kalitsiinnarneqarnissaq mianersoqqussutigaa.
– Issittumi Alaskami aamma Canadami innuttaasut misigeriigaat misiginiarlerpagut. Avatangiiserput mianersuuttariaqarparput, avatangiisini tunngavik tamaat nunarsuarmik kissakkiartuinnarnerata allanngortikkiartuinnarmagu, Aqqaluk Lynge sermitsiaq.gl-imut oqarpoq.
– Soorunami aningaasarsiutaasinnaasut sulliffissallu tikilluaqqusariaqarpagut, sumiiffinnili assingiinngitsuni pisuussutit pissarsiarineqarsinnaasut naammapput, uranip piiarnissaa pinngitsoorsinnaallugu, tamannami Australiami aamma Canadami ajornartorsiutaammat annertooq.
– Namminersulivinnissamilli kissaateqarnermut tamanna qanoq attuumassuteqarpa?
– Namminersulivinnissaq peqqutigalugu avatangiiserput aserussagutsigu aningaasarsiornikkut namminersulivinnissaq akisuallaarujussuartumik akilissavarput. Isumaqarpunga pilerineq annikillisariaqaripput, pisuussutit paasiniarlugit, silaannaap allanngoriartornerata sunniutai paasiniarlugit kiisalu silatusaarluta, Aqqaluk Lynge oqarpoq.