Pingaarnerutitaq: Pissusiviusut atulerpagut

Silarsuup sinnera uuliap akiinik qaffakkaluttuinnartunik atuileriikatannikuusoq uagut pikkorissunik uuliarsiniartartoqarallartilluta akinik silarsuarmi akiusuninngaanniit appasinnerungaartunik atugaqartuarsimavugut.

Nukissiorneq Kalaallit Nunaanni appasissumik aalaakkaasumillu akeqarusaartuarsimavoq, massakkulli taamaattuaannarsinnaajunnaarpoq. Uuliamillu akuiaasarnermi aningaasartuutaasartut qaffassimammata uuliap ikummatissap akia sapaatip akunnerani uani aamma literimut 50 ørenik qaffanneqarpoq. Pissusiviusut paasigasuaannartariaqalerpagut:

Uuliamit tunisassiat siunissami akisunerusumik akilertalissavagut - qaffasinnerujussuarmik, tassami isumaqatigiissutaasimasut massakkut atuuttut 2009-ip naanerani atorunnaarpata allaqquttoqarsinnaajunnaassaaq. Taava nunani allani atugassarititaasut uaguttaaq atortariaqalissavagut - tassalu nukissiorneq akitsoriarujussuassaaq.

Pissusiviusut malilissavagut, tassnilu tamatta eqqugaassaagut. Uulia ikummatissaq sapaatip akunnerata ataatsip siornatigut literimut 3,72 kroneqarpoq, 2010-mili 6 kronit sinnerlugit akeqalernissaa ilimagisariaqarparput - immaqaluunniit suli akisunerulluni, tassami akit appariartoqqilernissaat ilimananngilluinnarmat.

Akit qaffannerat aalisartunut inuussutissarsiortunullu allanut malunnassaqaaq. Atuisartut nalinginnaasut kiassarnermut, assartuinermut innaallagissamullu akiliutigisartagaannut malunniuteqassaqaaq, akillu qaffarujussuarnissaat aamma pisortat suliffeqarfiutaasa innaallagissamut kiassarnermullu aningaasartuuteqartarnerannut sunniuteqarujussuassaaq.

Tamatta sakkortuumik eqqugaalluta sakkortuumik piumaffigineqassaagut. Taamaattorli arlalinnik periarfissaqarpugut. Aningaasaqarnermut nunanullu allanut tunngasunut naalakkersuisup Aleqa Hammondip sapaatip akunnerani uani oqallisissiami allanneratut, nukissiornermut aningaasartuutit qaffariarujussuarnerisa aamma erngup nukinganit nukissiuuteqarnissamut nukissiutaasinnaasunillu allanik atuinissamut isummertarneq aamma allanngortissavaat.

Ullumikkut aningaasarsiornerup tungaaniit isigalugit soqutiginanngitsut immaqa aqagu soqutiginarsissapput. Tamannalu avatangiisinut iluaqutaaginnarsinnaavoq.

Allatut oqaatigalugu, sipaaginnarata aammali nukissamik atuinerput eqqarsaatigeqqissaartariaqarparput. Oqaatsit soorlu inerisaaneq, nutaamik eqqarsarneq allanngortitsinerlu pingaaruteqartorujussuanngussapput.

Peqatigitillugulu aamma nukissiornermi akit qaffannerat pissutigalugu taarsiivigineqarnissamik piumasaqarnissamik eqqarsartarnerput aamma qimattariaqassavarput. Uuliap akiisa literimut 50 ørenik qaffanneqarnerat pissutigalugu KNAPK taarsiivigineqarnissamik qinnuteqareerpoq. Kattuffiup qaffaaneq aalisartunut piniartunullu ukiumut 22 millioner kroninik naleqassanerarlugu kattuffik akit appasissuunissaasa qularnaarneqarnissaanik piumasaqarpoq.

Ilumoorpoq aalisartut piniartullu sakkortuumik eqqugaassammata. Taarsiissuteqartoqarnissaali akillu appasissuunissaasa qularnaarneqarnissaat tapersersorsinnaanngilarput.

Tassami kikkut tamarmik taarsiivigineqartassappata Aleqa Hammondip oqarneratut landskarsi immikkut 400-500 millioner kroninik, taamaallaat akileraarutit qaffarujussuarnerisigut matussuserneqarsinnaasunik, aningaasartuuteqartalissaaq.

Takusariaqalerparput silarsuarmi inuiaqatigiissuarnut illersugaanngitsunut ilaaleraluttuinnartugut. Namminiilerneq ukiunilu aggersuni namminiilivikkiartuaarnissaq nuannisaakalaarnerinnaassanngillat; ukiut taakku suleruluffiussapput, nammineq nikorfasinnaanerput ukiuni taakkunani uppernarsassagatsigu.

Nukissiornerup akisunerulerneratigut qularnanngilluinnartumik aningaasaqarnikkut qanoq iliuuseqarsinnaanitsigut qanittoq ungasiartorlu isigalugit oqitsorsiunnginnerulissaagut. Aningaasat inuuniarnermut aningaasaliinermullu atugassagut ikinnerulissapput, inuiaqatigiinnilu aningaasanik atuineq tamarmiusoq appariassaaq.

Imaanngilaq ajutoornersuarmik nalaataqaraluttualersugut, politikikkulli oqalorusaaginnartoqarsinnaajunnaassaaq. Aningaasaqarnikkut piviusut tunaartarilluinnarlugit ingerlasariaqalissaagut, taakkulu maannakkorpiaq imaannaanngitsutut nuanninngitsutullu isikkoqaraluarlutilluunniit aamma periarfissanik nutaanik nassataqarumaarput.

Taamaattumillu politikerit, inuussutissarsiortut taakkulu kattuffii sulisartullu peqatigiiffii suleqatigiillutik kalaallit inuiaqatigiit allaqqussinnaanngitsumik allanngornissaanni alloraqatigiinnissamik pilersitsisariaqarput. Taamaattariaqarmat.

Powered by Labrador CMS