Skip to main content

Qulimiguulimmik Atlantikoq qulaallugu

Angutit marluk maannakkorpiaq Canadamiipput, kisianni qulimiguulimmik Atlantikoq qulaallugu angalanissaat USA-mi Oregonimi aallartippoq.

Angutit norgemiut marluk juunimi qulimiguulimmik sisamanik inuttaqarsinnaasumik Norgemi takusassarsiornermut atugassaminnik pisipput. Angutit qulimiguullip USA-mi pisiamik assartornissaanut tunngatillugu periarfissaat marluupput. Umiarsuarmut nassiussinnaavaat imaluunniit namminneq aqullugu angerlaassinnaallugu.

Angutit periarfissaq kingulleq toqqarpaat, kisianni aappaa peqataasinnaanngimmat Johan Høegh Upernavimmeersoq taartavoq.

Angutit marluk maanna qulimiguuliaqqamik atlantikoq qulaallugu timmisut tassaapput:norgemiu Arve Heetland 35-nik ukiulik aamma Johan Høegh Hansen Upernavimmiu. Tamarmik timmisartortartutut ilinniarsimapput.

- Timmisartorneq toqqarneqarpoq inuunerup sinneranut misigisaqarnissaq pillugu aammalu aqqutaani misilittakkanik pissarsinissaq anguniarlugu, Johan Høegh Hansen oqaluttuarpoq.

Angutit takku marluk maannakkorpiaq Canadamiipput, namminnerlu oqaluttuarnerat malillugu angalanerminni maannamut pissanganarnersarigaat Iqalunniit Qikigtarjuat-nut ingerlaarnertik.

- Tuttut, puisit nannullu takuagut, qaqqami pujortoq ingerlaqqissinnaajunnaaqqasimavugut, inuit assigiinngitsut pissanganartullu naapippagut. Uannut inunnik naapitsinera pissanganartuuvoq. Ataatsimoorutilerujussuuvugut naatsunnguakkuutaanillu oqaloqatigiissinnaalluta, Johan Høegh Hansen oqaluttuarpoq.

- Illuatungaatigut ingerlaarnermi pinngortitami timmisartorneq annilaarnarnerpaajuvoq. Mikisuararsuartut sanngiitsuararsuartullu misigisimanarpoq, aamma pinngortitamut silamullu ataqqinninneq angeqaaq, Johan Høegh Hansenip oqaluttuani nangippaa.

Angutit 2 tiimikkaarlugu ingerlatitsisarput, kisianni nalunaaquttap akunnerini tallimani timmisinnaapput. Qulimiguulimmi nerisassaqarput, ajutuussagaluarunik nerisassamaateqarlutik, aniguiniarnissamut atortoqarlutik, annanniuteqarlutillu allanillu. Aamma aqqutaani nannunik naammattorsissagaluarunik aallaasinik sillimmateqarput.

Angalaneq USA-mi Oregonimi Hillsboro-mi aallartippoq, maannakkullu Nunavummiipput. Tassanngaaniit Sisimiunut Kangerlussuarmulluunniit ingerlaqqissapput, Nuummut, Paamiunut, Narsarsuarmut, Kulusummut, Reykjavikimut, Savalimmiunut, ShetlandipQeqertaanut, Stavangerimut naggataagullu Torpimut. Kalaallit Nunaata sineriaa atuarlugu ingerlaassapput, sermersuaq portuallaaqimmat.

Angutit Norgemi internetimi namminneq nittartagaqarput, aamma tassani blogiminni allattarlutik. Tassuunakkut Atlantikoq qulaallugu angalanerat atuarneqarsinnaavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER