INI: Elregningini kukkunermi uagut pisuunngilagut

Ininik attartortut 100-it missaanniittut elregningiisa kukkuneqarnerat inissiaatileqatigiit kukkunerigaat INI-p ilumunnginnerarpaa.

Kukkuneq uaniippoq, attartortut innaallagiaq erngup aqqutaanik inissiamut ingerlasumut qeritsaaliuutaasoq Nukissiorfrinnut toqqaannartumik akilertarsimammasuk.

Attartornermut peqqussut naapertorlugu aningaasartuut taanna inissiaatileqatigiiffiit immikkoortortaanni ataasiakkaani ineqarnermut akiliutikkut akiligassaavoq.

Suliani arlalinni INI-p attartortut qerinaveersaammut toqqaannartumik akiliisartutut unitsissimavai, taammaanneranillu Nukissiorfiit qerinaveersaammut sarfamik matusinissaq sioorasaarutigisimallugu.

- Attartortut akilisussaajunnaarsippagut, kukkusoqarsimanera takusinnaagatsigu. Taakku qerinaveersaarutip sarfaanut toqqaannartumik akiliisussaanngillat. Peqatigitillugu nukissiorfiit ilisimatipparput attartortut inissiaatileqatigiiffiata kiffartuussineq taanna akilissagaat, INI-p aningaasaqarnermut pisortaa Charlotte Nørregaard erseqqissaavoq.

- Soormi attartortut Nukissiorfinnut toqqaannartumik aaqqiissuteqaqqullugit qinnuigiinnanngilisigit, taamaalilluni qerinaveersaammut innaallagissaq akilernissaa pineqartillugu kinguleruttoornissaq pinngitsoortinniarlugu.?

- Taamatut iliorpugut attartortunut kiffartuunniarlugit, taakku ingerlatsiviit assigiinngitsut akornanni uteqattaartinneqarnissaat pinngitsoorniarlugu. Kukkuneq uagut pisuussutiginngisarput iluarsisimavarput, aamma aningaasat 3000 kr.-nit attartortumut utertissimavagut, akiligassarlu taamaaliortariaqanngikkaluarluta inissiaatileqatigiit immikkoortortaanut ingerlateqqissimallugu, Charlotte Nørregaard oqarpoq.

Taassuma ilannguppaa, attartortut elregningertik pillugu nalornissuteqartut INI-p atuinermut immikkoortortaqarfianut saaffiginnissinnaasut, taakku Nukissiorfiit suleqatigalugit attartortut iluamik nalunaarsorsimanersut misissorsinnaammassuk.

Kukkusoqarsimappat aningaasat kukkussutaasimasinnaasut utertinnissaat Nukissiorfiit akisussaaffigissavaa, kingornalu tamanna attartortunut nalunaarutigalugu, aningaasartuut peqqussut naapertorlugu ineqarnermut akiliutikkoorlugu akilerneqarsinnaassammat.

Powered by Labrador CMS