Ammerinermut inngernermullu kulturikkut nersornaasiinerit
Priscilla Josefsen aamma Anna Kuitse Thastum inuiattut ullorsiornermi nersorniarneqarput.
Priscilla Josefsenip aamma Anna Kuitse Thastumip arfininngormat ullaap-tungaani suna pillugu kalaallit Nunaanni Namminersornerullutik Oqartussat qangaaniilli ingerlattagaanik kulturikkut nersornaaserneqarnertik Kalaallit Nunaata kulturikkut illorsuani Katuami takutippaat.
Paarlersuarmi igalaamerngit iluinittut amernik mersugarpassuit kusanartut, soorlu kamiit, allaffinni allequtassiat imerfiillu Priscilla Josefsenip assassornikkut kusanartuliorsinnaassusianut uppernarsaataapput.
Anna Kuitse Thastumip tunumiutut qilaatersorluni ingernermigut Katuami tusarnaartut nuannaaqisut assuffattullu aammalu sineriak atuarlugu TV-kkut isiginnaartartut suli amerlanerusut nuannisartippai.
– Naalakkersuisut aalajangerpaat ukioq manna kulturikut nersornaat Priscilla Josefsennimut Anna Kuitse Thastumimullu tunngiunneqassasut, taakua kulturikkut kingornussatsinnik tammatsaaliugassanik suliaqartuummata, taamak kulturimut naalakkersuisoq Tommy Marø nersornaasiinermut tunngavilersuinermini oqarpoq.
Priscilla Josefseni Nuummi kommunip ammeriviani Kittat-ni pisortatut 1982-imi ilisimaneqarlualernini sioqqullugu ukiorpassuarni ammerinermik suliaqatareersimavoq.
– Kalaallit inuiattut atisaata pinnissusia ima tiguartinnartigaat uagut kinaatsitsitsinnik immikkuullarissutsinnillu takutitsisuulluni, Tommy Marø oqarpoq.
Anna Kuitse Thastum Tunumi illumi issunik ujaqqanillu sanaami ininngorsimavoq, tassanilu angajoqqaavi qatannguterpassuilu tivanermik inerlataqarsimallutik. Nunani allani sivisungaatsiartumik najugaqareerluni Kulusumut uterpoq, tassanilu ilaqutariit ileqqutoqaat ilinniartitsisutut ingerlateqqissimallugu.
– Issittumi inngertaneq ileqqutoqaavoq ima ititigisumik sorlaqartoq kulturikkut kingornussatsinnut ersiutaalluni, Tommy Marø oqarpoq.
Erinarsoqatigiit Nipi-kkut aqutsisumit Per Rosingimit siulersorneqarlutik nersornaasiinermi akunniliisarlutik erinarsoqatigiittarput.