Politiit qilalugaq unioqqutitsinikkut pisaq arsaarinnissutigaat
Qilalugaq qernertaq inersimasoq angisooq 2,50 meterinik takissusilimmik tuugaalik sapaatiummat illoqarfimmi aalisartunit piniartunillu aallaarsarineqarluni pisarineqarpoq. Kisianni qilalugaq kingornatigut politiinit unioqqutitsinikkut pisarineqartutut arsaarinnissutigineqarpoq.
Piniartut aallaqqaammut qilagugaq qaqortaasorisimavaat, kisianni paasinarsivoq qilalugaasoq qernertaq qaquartoq inerilluarsimasoq, ilaminit avissaaqqussimasoq, knr.gl oqaluttuarpoq.
Peter Olsen, illoqarfimmi aalisartunut piniartunullu KNAPK-mi siulittaasuusoq oqaluttuarpoq, umiatsiaaqqat 30-it missaanniittut siullermik qilalugaq qaqortaassangatinneqartoq pisariartorlugu aallakaasimasut.
- Taava paasivarput qilalugaq qernertaasoq qaquartumik mattalik. Qilalugaq pisarnertut pisarineqarlunilu pilanneqareersoq politiit takkullutik arsaarinnissutigaat, Peter Olsen oqaluttuarpoq.
Taassuma oqaluttuaraa, qilalugaq arsaarinnissutaagaluartoq aalisartut pisarineqarnera nuannaarutigiinnarsimagaat, taakku piffissami kingullermi qilalukkanik qaleralinnut akornutaasunik akornusersorneqarnertik naammagilersimagamikku.
Politeeqarfimmi pisortap Janus Ejgaardip ilisimatitsissutigaa, politiinut suliassanngortitsisoqarsimasoq, aammalu misissuineq aallartinneqareersoq.