Kristine Kreutzmann sølvimik nersornaaserneqarpoq
Kristine Kreutzmann, Maniitsoq, Namminersornerullutik Oqartussat nersornaasiuttagaannik Nersornaammik sølvimik nersornaaserneqarpoq.
Kristine Kreutzmannip ilaatigut uigigaluanilu Hendrik Indalik Kreutzmannilu meeqqat 11-t perorsarsimavai. Ilaqutariit aalisarnermik piniarnermillu inuuniuteqarsimapput, Kristinelu tapersersuisuulluarsimavoq, uimi politikimik sulinerani, peqatigiinni sulinerani aammalu ilaqutariit aningaasarsinerannut tapertaasarsimavoq puisit amiinik kusanartunik suliamigut aammalu timmissat amiinik kusanartunik mersukkamigut, Namminersornerullutik Oqartussat nersornaasiinermut tunngavilersuinerminni paasissutissiiput.
Tamatuma saniatigut Kristine Kreutzmannip ukiorpassuarni annertuumik sulissutigisimavaa Kangaamiut ukiumoortumik nunaqarfiup nalliuttorsiornerata nalliussineqartarnissaa kiisalu erinarsoqatigiinni peqataasarsimalluni.
Nersornaat pingasunngormat inatsisartut siulittaasuannit Ruth Heilmannimit, Siumut, tunniunneqarpoq.