Skip to main content

Kongsgårdimik peqalerpugut?

Qaqortukuluumi qallunaatsiat oqaluffiata eqqaani Hvalsøgårditut maannamut ilisimaneqartoq imaassinnaavoq norskit kunngiata Kalaallit Nunaanni qullersaqarfiata Thjodhildarstadirip illorsuarigaa.

Taamaassinnaavoq Reykjavikimi Arne Magnusson Insitutimi Islandimi oqaatsinik ilisimatuut nuimanerpaanut ilaasut marluusut Johannes B. Sigtryggsson aamma Kari Kaaberip allakkat atuuttussanngortitaat malissagaanni. Isumaq aamma sumiiffiit atiinut immikkut ilisimasalimmit Svavar Sigmundssonimit tapersersorneqartoq.

Immikkut ilisimasallit pingasuusut norskit aallartitaata Ivar Bardarsonip Kalaallit Nunaanni 1300-kkut qiteqqunneranni pissutsinik allaaserisimasai atuarlugit isumasioqqissaarsimavaat, isumaqatigiissutigaallu Hvalsøp oqaluffia pillugu allaaserisat taamatut paasineqarluni atuarneqartussaasoq.

Siusinnerusukkut isumaasimagaluarpoq kunnip illuarsuaa kangerluup tuliani Kangerluarsummiissimassasoq (allaaserisatoqqani Kambstadafjordimik taaneqarsimasoq), kisianni kangerlummi tassani illorsuaqarfinnik anginerusunik nassartoqartarsimanngilaq.

Taamaattumik isumaqaqqajaanarpoq Islandimiut immikkut ilisimasallit ilumoortut aammalu isumaqarnarsinnaasoq sanaartukkami angisuumi oqaluffittut ittumi norskit kunngiat akuliusimasinnaasoq, taanna sanaartornermut kiisalu oqaluffiup illorsuullu sananeqarnerani immikkut ilisimasalimmik aallartitsinissamut aningaasalersuinissamut akissaqartuummat.

Illorsuaq oqaluffiup sananeqarnerata nalaani teknikkilu assinga atorlugu sanaajuvoq, qularnanngitsumillu erlinnartuuinut, umiarsuit usiinut allanullu kunngip pigisaanut peqqumaasivittut/ilitsivittut qularnaarinninnissamut siunertaqarsimalluni. Illorsuup taamaattup inuit ikiup ingerlanerani katsersuuffigitartagaanni oqaluffiup eqqaannut inissinneqarnissaa naleqquttuussaaq.

Thjodhild illorsuarmut atsiunneqarsimasoq kinaanersoq oqaluttuarisaarnermi allattugaatini allassimanngilaq.

Kunngip illorsui Savalimmiuni Kirkjubømit Orkneyllu Qeqertaannit ilisimaneqarput. Ukiunilu makkunani Islandip Avannaani Skagafjordimi assaaneq annertooq ingerlanneqarpoq, tamaani pissutsinut assingusoq oqaluffittalik illorsuartalillu nassaarineqarsimalluni.

Islandimiut kunngip illorsuaa nassaarisimappassuk Atlantikup Avannaani kunngip illorsuai arlallit nalissaqanngitsut aamma takornarianut suliniutissaasinnaasut pigineqalissapput.

Oqallisigineqartoq pissanganartuvoq, ukioq mannarpiarlu Qaqortukuluumi katittut kingullersaasa ukiut 600-nngornerata nalliussineqarnissaa iluatsillugu Qaqortumi ukiamut qallunaatsiaat pillugit ataatsimeersuartoqarnerani ilanngullugu eqqartorneqartussaqqillluni.










Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER