Atuartut Paamiormiut iffiornermik ilinniarput
Paamiuni Atuarfik Tuiisami 3.B-mi atuartut Narsami inuussutissalerinermik ilinniarfimmi INUILI-mi atuartinneqarput.
Tallimanngorpat ualikkut Paamiuni Atuarfik Tuiisami 3. B-mi atuartut 14-it Narsami inuussutissalerinermik ilinniarfiup INUILI-p aasaanerani tuniniaanerani atuartut nerisassaannik peqqinnartunik pissanganartunillu tuniniaassapput.
Atuartut Paamiormiut qaammat kingulleq 20.000 koruuninnallutik ajugaapput, pitsaaliuinermik allaffiup Paarisap nuna tamakkerlugu atuartunik unammisitsinerani "Pualanartunik peqqissuuneq"-mi, tassani Kalaallit Nunaanni klassit qaffasissutsit tamarmik peqataanissamut qaaqquneqarput, atuartunut nerisassanik peqqinnartunik pissanganartunillu siunnersuuteqaqqullugit.
Aningaasat akissarsiamik saniatigut 3. B-mi atuartut neqeroorfigineqarput ulloq ataaseq igaffimmiissasut igasumik ilinniartitsisulerlutik, tassani atuartut namminneq atuartut nerisassaannik pissanganartunik sinnattorisaminnik sanassallutik.
- Igasumik Paamiunukartitsinani inuussutissalerinermik ilinniarfiup atuartut 14-it ilinniartitsisuilu marluk Narsamut qaaqqusimavai, forstander Esben Toftdahl sermitsiaq.gl-imut oqarpoq.
Paamiuni atuartut sisamanngormat Narsamut pipput, tassani akunnermi siullermi flutes-inik pita-brødinillu peqqinnartunik iffiorlutik.
- Tallimanngormat ullaap tungaani fagit arlallit sammineqarput soorlu iffiamik sandwichiliat peqqinnartunik pissanganartunillu akullit, pita-brødit savaaqqamik akullit aamma landgangsbrødit salatillit kalaallit qallersuutaannik akullit, ilinniartitsisoq Marie Toftdahl sermitsiaq.gl-imut oqaluttuarpoq.
Taquassallu peqqinnartut pissanganartullu ualikkut aasaanerani tuniniaanermi tuniniarneqassapput.