Aasianni GU tamanut ammasoq
Ukiunik 25-inngortorsiorluni nalliuttorsiornermut atatillugu sapaatip akunnerata naanerani Aasianni Ilinniarnertuunngorniarfik sapaammi tamanut ammasimavoq.
Ilinniarnertuungorniarfiup matuni Aasiannut innuttaasunut nalunaaqutaq 13 ammarpai. Taamalu aaqqissuussinerup 3½ tiimini ammanerata nalaani takusassaqaqaaq.
Ilaatigut fysikkertarfimmut isertoqarsinnaavoq, tassannilu aap qaffasissusia BMI uuttortinneqarsinnaalluni, imaluunnit tamorasaartortoqarlunilu imertortoqarsinnaalluni, kemi-lerisarfimmi kemi pillugu takutitsineq isiginnaarneqarsinnaalluni. Ilinniartut ilaatigut assersuutigalugu innerup qalipaatai assigiinngitsut takutippaat, soorunami ilinniartitsisumik nakkutilliisulerlutik.
Ilinniartut aamma ilinniarnertuunngorniarfimmi atuarneq anoq innersoq isiginnartitsissummik piareersarsimapput. Taanna illarnartortaqarluarsimavoq. Isaarissami katersuuttarfik ullikkaavippoq, ilaallu majuartarfinni nikorfarrapput, immaqa takusaqarluarsinnaanngikkaluarlutik.
Aasianni sapaatip akunnerata naanera tamanut ammatitsinermik piinnarani aamma tusarnaartitsisoqarpoq, katersugaasivimmi "Aasiaat atuarfeqarfittut" pillugu saqqummersitsisoqarluni, aammalu ilusilersugaq nalliuttorsiornermut atatillugu illoqarfimmi eqqumiitsuliortumit Jens Keldsenip suliaa uleerneqarluni.
Aamma nalliuttorsiornermit assut assiisivimmi takukkit her.