Atuaqatigiit pujortartanngitsut

PAARISA ukiut tallimassaat akullernut angajullernullu pujortartannginnissamik unammisitsilerpoq.

Unammisitsinerup siunertaraa meeqqat inuusuttullu, avatangiisit ulluinnarnilu unammillerneqarsinnaasut naapertorlugit peqqinnartunik qinigaqarsinnaanermik peqqinnartumillu inuunermik qinigaqarsinnaanermik ilisimasaqassusaannik annertunerulersitsinissaq. Namminneq pilersitsisinnaanerat peqataanermikkullu sunniuteqarsinnaanerat qitiutinneqassaaq, peqqinnerulersitsisinnaasunik sammisaqarneq siammarsaanerlu aqqutigalugit, Paarisa nanoq.gl-ikkut allappoq.

Unammisitsinermi ajugaasut akissarsiassaat 20.000 kr.-iuvoq.

Unammisitsinermi peqataanissamut piumasaqaatit makkuupput: Atuaqatigiit tamarmik pujortartuussanngillat. Pujortartartoqarpat taakku atsaat pujortartarunnaarpata, atuaqatigiit unammisitsinermi peqataasinnaalissapput. Augustimiit novembarimut atuaqatigiit atuartunut allanut ima-luunniit inersimasunut pujortarunnaarnissaq pillugu sammisaqartitsinernik ingerlatsissapput. 5. klassimiit 11.klassimut atuaqatigiiaat tamarmik unammisitsinermi peqataasinnaapput, 30. november 2008 nallertinnagu atuaqatigiit ilinniartitsisortik peqatigalugu sutitsisarsimanertik pillugu PAARISA-mut nalunaarusiaqassapput.

30. november 2008-ip kingorna naliliisussat PAARISA-mit toqqarneqarsimasut ajugaasut kikkuunissaat aaliangiiffigissavaat.

- Meeqqat pujortarnaveersaarnikkut annertuumik iluanaarsinnaapput. Pujortartarneq meeqqat alliartornerannik, isumaannik ilikkagaqarsinnaanerannillu ajoqusersuisarpoq. Meeraanermi, inuusuttuunermi kingusinnerusukkullu aamma inersimasuunermi pujortartaraanni peqqissutsikkut ajoquserneqaatigisarpaa. Taamaammat pujortartartut ikiliartornissaat anguniarlugu meeqqat inuusuttullu ikiuunnissaat pisariaqartipparput, Paarisa allappoq.

Powered by Labrador CMS