Dash 8 Nuup Kulusuullu akornanni
Nutartigaq:Air Greenlandip suluusalik Dash 8 Air Icelandimiit attartorpaa Kitaani timmisartunik amigaateqarumanani.
Air Greenland Kitaaniit Kangianut sap.ak. marloriarluni, pingasunngornikkut arfininngornikkullu timmisartuussisarpoq.
Piffissami juunip 28-niit aggustip 23-annut (arfiningornerni) aammalu juulip 23-niit aggustip arfernannut (pingasunngornerni) Air Icelandip Air Greenland sinnerlugu timmisartuussisassaaq, Air Greenlandip tusagassiisartua nalunaarpoq.
DASH-8-Q100 DASH-7-miit minnerulaarpoq, aqqummulli tassunga atugassatut naammalluni, allakkat, ilaasut nassiussallu eqqarsaatigalugit.
Timmisartuutileqatigiiffimmiit erseqqissarneqarpoq Das 8 Q100 pineqartoq timmisartumut Dash 8-mut siorna ajutooqattaartumut paarlaanneqassanngimmat. Dash 8 ajutoqattaartoq Q400-uuvoq, Q100-li mikineruvoq ajoquteranilu, Air Greenland erseqqissaavoq.