Skip to main content

USA nunatsinni aningaasalersuissaaq

Joint Committee-mi ataatsimiinnerit tallimassaat Washington-imi ingerlanneqassaaq.

Inuit nunatsinneersut, Danmark-imeersut USA-meersullu 40-t missaanniittut USA-p nunattalu suleqatigiinnertik qanoq ilillugu annertusisinnaaneraat paasiniarlugu Washington-imi ataatsimiilerpata oqaluuserisassat amerlaqaat.

Joint Committee 2004-mi Igalikomi Isumaqatigiissutip kinguneraa, isumaqatigiissummi USA-p Thule-mi radarip EDB.kkut nutarterneqarneranut taarsiullugu suleqatigiinnerup annertusineqarnissaa neriorsuutigaa.

Joint Committee-mi tallimassaanik ataatsimiinnermi qulequttat pingaarutillit oqaluuserineqartussat tassaapput ilinniartitaaneq, ilisimatusarneq, avatangiisit, aningaasalersuinerit takornariaqarnerlu. Suleqatiginnikkusussuseqartoqarpoq, kisianni kissaatit tamaasa piviusunngortinneqarnissaannut aporfiit annersaraat aningaasanik amigaateqarneq. Ilinniartunik paarlaasseqatigiittarnissamut, ilisimatusaatigalugu suliassanut, il.il., aningaasat amigaataapput.

Kisianni amerikamiut nunatsinni amerlanernik aningaasalersuinissaat neriuutigineqarpoq. Alcoa-mik pilersaarut pilersaarusiorneqarpoq, taannalu Joint Committee-mi suleqatigiinnerup kingunerisa ilaat. Greenland Venture-p neriuutigaa, nunatsinni attaveqaatitigut pilersaarutini annertuuni amerikamiunik aningaasalersuisinnaasunik pissarsisinnaanissaq.

Nunanut allanut tunngasunut aningaasaqarnermullu naalakkersuisoq Aleqa Hammond Washingtinimut ataasinngormalli pereerpoq, tassani siullermik ataatsimiinnermini qallunaat USA-mi aallartitaat Friis Arne Petersen ataatsimeeqatigalugu. Aleqa Hammondip marlunngornermi amerikamiut nunanut allanut ministeriata tullersortaa Paula Dubriansky USA-p Issittumut tunngatillug isumaa pillugu ataatsimeeqatigalugu.

Marlunngornerup ingerlanerani Joint Committee-p tallimassaanik ataatsimiinnissaanut peqataasussat tamarmik Washington-imi katersuupput, marlunngornermilu unnukkut peqataasunut ilasseqatigiisitsisoqarluni.

Nunatsinniit Aleqa Hammondip saniatigut peqataapput nunanut allanut tunngasunut pisortaqarfimmit Inuuteq Holm Olsen aamma Kulturimut, Ilinniartitaanermut, Ilisimatusarnermut Ilageeqarnermullu Naalakkersuisoqarfimmiit aamma Inuussutissarsiornermut, Suliffissaqartitsitsiniarnermut Inuussutissarsiornikkullu ilinniartitaanermut Naalakkersuisoqarfimmiit aallartitat.

Aamma peqataapput Thomas Rosenkrands Kalaallit Nunaanni Takornariaqarnermut Inuussutissarsiornermullu Siunnersuisoqatigiinniit, Jørgen Wæver Johansen Greenland Venture-miit aamma Keld Hornbech Svendsen Asiaq-miit.

Jesse Kleemannip eqqumiitsuliortut sinniisuuffigai, Kenneth Høegh-ip silaannaap allanngoriartornerisa kalaallinut inuiaqatigiinnut sunniutaat oqaluttuarai.

Danmarkimiit peqataapput Nunanut allanut ministeriaqarfimmiit, Illersornissamut ministeriaqarfimmiit, Ilinniartitaanermut ministeriaqarfimmiit. Avatangiisinut ministeriaqarfimmiit Aningaasaqarnermullu ministeriaqarfimmiit aallartitat. Peqataapputtaaq Danmarks Meteorologiske Institut aamma Danmarks og Grønlands Geologiske Undersøgelser.

USA-miit peqataapput Københavnimi aallartitaqarfimmi sulisut. Aamma peqataapput Nunanut allanut ministeriaqarfimmeersut, Niuernikkullu ministeriaqarfimmeersut, aammattaaq peqataapput National Science Foundation aamma New York Ait National Guard, taakku sermersuaq ukiumut arlaleriarlutik qulaavaasarpaat.

Nunatsinniit aallartitat aqutsisoraat Inuuteq Holm Olsen. Taassuma namminersornerullutik oqartussani pisortaaneq Kaj Kleist taarserpaa, taanna statsministerip namminersorneq pillugu isumalioqatigiissitap isumaliutissiissutaa marlunngornermi tunniunneqassasoq aalajangermagu nunatsinniiginnartussaagami.

USA-mi aallartitanut aqutsisuuvoq amerikap Danmarkimi aallartitaqarfiani ambassadøri James P. Cain, Danmarkimiillu aqutsisuulluni nunanut allanut tunngasuni siunnersuisartoq ambassadørilu Zilmer-Johns.

James P. Cain Joint Committee-mi kingullerpaamik peqataavoq, præsidenti nutaa ukiup nutaap aallartinnerani ivertinneqarpat ambassadøritut sulinerminit soraassagami. 2005-imili ivertinneqarami ataatsimiinnernut peqataasarsimavoq, taamalu joint Committee-mi sulinermi arlaannik angusaqartoqarnissaa eqeersimaarluni peqataaffigiuarsimavaa.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER