Skip to main content

Cain nunatsinnukarusuppoq

USA-p Danmarkimi aallartitaa soraartussaq USA-p Kalaallit Nunaanni aallartitaatut sulilerusuppoq.

James P. Cain 2005-imiilli USA-p Danmarkimi aallartitaatut sulileramili Kalaallit Nunaannut Kalaallit Nunaannilu nallinginnaanngitsumik annertuumik suliaqarsimavoq. Amerikamiut aallartitarisarsimasaanut siuliinut sanilliullugu nalinginnaanngitsoq. Nunanut allanut tunngasunut pisortaqarfimmi pisortaq Inuuteq Hom Olsen aamma Joint Committee-p Washingtonimi pingasunngornermi ataatsimiinneranni oqarpoq, James P. Cain Kalaalit Nunaannut aallartitaasartunit tamanit pitsaanerpaasimasoq.

James P. Cainip Joint Committee-mi ataatsimeeqataanera kingulliuvoq, taamaattumik Inuuteq Hom Olsenip James P. Cain sulilluarsimanera pillugu qutsavigaa, namminersornerusuniillu tunissutinnguamik tunillugu. Kiinarpaat nunatta Kangianeersut marluk.

USA-mi præsidenti nutaat ukiumit nutaamiit sulilerpat James P. Cain Københavnimi aallartitatut atorfimminit tunuassaaq, taassumalu namminersortumik inuussutissarsiornermik suliaqartuni sulilernissani naatsorsuutigaa.

Aallartitaq tunissummut qujassuteqarluni oqaluttuaraa, nammineq Joint Committee-mi ilaatigut USA-p Kalaallit Nunaanni aalajangersimasumik aallartitaqarfeqalernissaa suliniutigisimagini.

- Isumaqarpunga Kalaallit Nunaat USA-mut ima pingaaruteqartigisoq, Nuummi aallartitaqarfeqalissaguni pissusissamisuussasoq. Tamannalumi aamma iluatsingajalluinnarpoq, tamarmik siunnersuut isumaqatigaat. Kisianni Kongres-imi sipaarniuteqartussaammat unitsinneqarpoq, James P. Cain oqaluttuarpoq, naggasiillunilu:

- Neriuutigaara ullut ilaanni USA-p Kalaallit Nunaannit aallartitaasa siullersarilerumaaraanga.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER