MIPIp siunissaa kinguartinneqarpoq
Meeqqat inuusuttullu pillugit ilisimasanik katersuiffissaq Inatsisartut suleqatigiissittamut inatsisartullu ataatsimiititaliaannut ingerlateqqippaa.
Ilisimasanik katersuiffissap siunissaa politikerit atorfillillu MIPIs siulersuisui ilagalugit oqaluuserigallassavaat.
Asii Chemnitz Narupip,?Inuit Ataqatigiit, siunnersuutaata pingasunngormat siullermeerneqarnerata kingorna Inatsisartuni taamatut eqikkaalluni aalajangiisoqarpoq.
Siunnersuutip MIPIp massakkut inissisimanera allanngortittussaavaa ilisimasanik katersuiffik nammineerluni ilisimatuutut misissuisarsinnaalersillugu namminerlu suliffeqarfittut Ilimmarfimmut attaveqarsinnaalersillugu. Siunnersuummi tunngaviusoq MIPIp siulersuisuisa namminneq 2006-imili siunnersuutigisimasaat.
Naalakkersuisut siunnersuut atorsinnaanngitsuutissimagaluarpaat. Ilaatigut ilinniartitaanermut naalakkersuisoqarfik, KIIIN, isumaqarmat taanna Ilimmarfimmi inissaqanngitsoq.
Amerlanerussuteqartulli tassaasut Siumukkut, Inuit Ataqatigiit, Demokraatit kattusseqatigiillu siunnersuut Inatsisartut Ilaqutariinnut Peqqinnermullu Ataatsimiititaliiaannut ingerlateqqitassanngortippaat, tamatumaluu kingorna ukiakkut ataatsimiinnermi oqaluuserineqartussanngortillugu.
– Suleqatigiissitarlu Inatsisartut ukiakkut ataatsimiinneranni tunniussinissaminut piffissalerneqarpoq, Ilaqutariinnermut Peqqinnermullu naalakkersuisoq Aqqalu Abelsen, Atassut, oqarpoq.
MIPI-llu siunissaa suleqatigiissitamit misissorneqartariaqarnerarpaa.
– Ingerlatsivik sunaluunniit Namminersornerullutik Oqartussanit aningaasalersorneqartussaagaangat taassumap siunissami aaqqissuunneqarnissaata sulisoqarnissaatalu qulaajarneqarsimasanissaa pisariaqartarpoq. Namminersornerullutik Oqartussat aningaasaqarnerat eqqarsaatiginatigu siulersuisut akiligassanik nassiussitiinnartarsinnaanngilagut, Aqqalu Abelsen oqarpoq.
Sermitsiaq atuaruk.