Kalaallit Nunaanni kigutigissarnermut ulloq 2008
17. april tassaavoq Kalaallit kigutigissarnermut ullorititaat – ulloq taanna tassaavoq kigutitta peqqissutsittalu malunnartinneqarfiat. Nuna tamakkerlugu assigiinngitsunik aaqqissuussinernik kigutit peqqissuunissaannik paarilluarnissaannillu tunngaveqartumik malunnartinneqassaaq.
Kalaallit Nunaanni nunarsuarmi nunanit allanit siullersaalluni Kigutigissarnermut ullorititaq aallartinneqarpoq. Kigutigissarnermut ullorititaq aappassaa ingerlanneqassaaq kigutigissuunissamillu suliaqartut siornatulli peqataasoqarluarnissaa neriuutigaat, taannami iluatsilluaqimmat.
Ukioq manna sammineqartussaq tassaavoq meeqqat mikisut kigutaasa paarilluarnissaat. Sammineqartussap imarisaa kigutigissuunissamik suliaqartut caries pillugu pilersaarutaanut, ukioq manna aallartinneqartumut, attuumassuteqarluinnarpoq, tassanerpiarmi meeqqanut mikisunut angajoqqaavinullu immikkut annertuumik suliniuteqarnissaq anguniarneqarmat.
Kigutit paarilluarnissaannut peqqissuunissaannullu ileqqut inuunermi siusissukkut tunngavilerneqartarput angajoqqaallu tassaapput meeqqamik kigutigissartarnissaannut kigutaasalu peqqissuujuarnissaannut akisussaasut. Kigutigissarnermut ullorititami angajoqqaanut – allanullumi - inuuneq naallugu qungutsorinnissamut kigutillu qanoq paarinissaannut isumassarsinissamut periarfissarpassuaqassaaq.
Kigutigissuunissamik suliaqartut siunnersuutit sisamat uku saqqummiukkusuppaat:
- Ullaakkut unnukkullu kigutitit salilluartakkit
- Meeqqavit kigutai 10-nik ukioqalernissaa tikillugu salittassavatit
- Kigutit qaqorsaataat sakkortuumik fluoritalik atortaruk – 1450 PPM pitsaanerpaavoq
- Ulluinnarni mamakujuit sodavandillu pinaveersaakkit