Kommuninik nutarterineq paasisassarsiorfigineqartoq
Kommune qanoq angitigilersinnaava? Meeqqat atuarfianni atuartut Sisimiuneersut maannakkorpiaq Nuummiipput, ilaatigut kommuninik nutarterineq paasisassarsiorfigiartorlugu, nuuk.gl allappoq.
Atuaqatigiit ilinniartitsisullu marluk Sisimiuni Minngortunnguup Atuarfianeersut ulluni makkunani paasisassarsiorlutik Nuummiipput, sisamanngornermilu rådhusimut pulaarput, Kangia-Kitaa kommunissamut nutarterineq tusagaqarfigerusullugu, tassani pilersaarusiornermut allatsi Kista Lynge Høegh paasissutissanik saqqummiivoq apeqqutinullu akissuteqartarluni.
- Atuartut Kalaallit Nunaanni kommuninik nutarterineq soqutigisimavaat, taakkualu ilaasa suliaminnut atatillugu tamanna itinerusumik pulaffigisimavaat, Johanne Olsen Ludvigsen, Sisimiuni atuarfimmi pisortap tullia oqarpoq.
Sisimiut kommuneat Maniitsup kommunealu kattuttussaapput, tamannalu atuartut paasisinnaasimavaat, illoqarfik sanilerisaq qaninneq ungaserujussuanngimmat.
- Ilissi kommunissassinni ungasissutsit annertoorujussuussapput. Atuartut takorloorpaat, angalanerpassuit atorneqartassasut immaqalu aamma sulisussanik pissarsiniartarnermi ajornartorsiuteqarsinnaassasut, Johanne Olsen Ludvigsen oqarpoq.
Naluneqanngitsutut Nuup Kommunea Paamiut, Ittoqqortoormiit, Ivittuut aamma Ammassalik 2009-mi januaarip 1-iani kattuttussaapput, kisianni ikaarsaariarnermi ataatsimiitsitaliat maajip 1-ianiit atuutileriissapput, kommunerujussuanngornissamut politikkikkut suliassat piareersassallugit. Ilaatigut aalajangiiffigissavaat, kommunerujussuarmi innuttaasut sutigut kiffartuunneqarnissaat, kommunerujussuaq qanoq ateqassanersoq aammalu kommunip ilisarnaatitaassaa qanoq ittuussanersoq aalajangissalluguttaaq.