Nammineerluni nalunaarsuivik nutaaq
Isertitat tpillugit nammineerluni nalunaarsuinerup annersaa siunissami akileraartarnermut pisortaqarfiup suliarisalissavaa.
Akissarsiavit allagartai pappiaqqallu allat ujartoqqaartariaqanngilatit ukiormanna nammineerluni isertitanut nalunaarsuiffik suliarineqalerpat. Akileraartarnermummi pisortaqarfiup suliassap annersaa ukiormannamiit suliarisalerpaa.
– Pingaaruteqarluinnarpoq akileraartartup paasissutissat nammineerluni nalunaarsuiffimmi immersoriikkat misissoqqissaassagai. Paasissutissat eqqortumik tamakkiisumillu immersorneqareersimassappata akileraartartup iliuuseqaqqinnissaa pisariaqassanngilaq. Akileraartartup immersorneqareersimasut saniatigut allanik isertitaqarsimappat, ilanngaateqarsimappat imaluunniit aningaasartuuteqarsimappat taava nammineerluni nalunaarsuiffik paasissutissanik taakkuninnga immersuissaaq nunallu immikkoortuani akileraaruseriffimmut nassiullugu. Paasissutissani naqeriikkani kukkuneqarpat amigaateqarpataluunniit nammineerluni nalunaarsuiffik aamma immersorneqassaaq nassiunneqarlunilu, taama Namminersornerullutik Oqartussat nalunaarput.
– Nammineerluni nalunaarsuiffik nutaaliaq periarfissallu nutaat innuttaasunit atorluarneqarnissaa Akileraartarnermut Aqutsisoqarfimmit neriuutigineqarpoq. Qarasaasiaq akileraaruseriffiusoq nutaaq suli ineriartortinneqarpoq ingerlaavartumillu innuttaasunut periusissanik periarfissanillu nutaanik ineriartortinneqassaaq, Namminersornerullutik Oqartussat naggasiipput.