Aput timmisartumik kinguaattoortitsivoq
Kulusumi aperujussuarnerata timmisartukkut angallanneq eqqorpaa.
Air Greenlandip timmisartuutaa Dash 7 maanna akuttusuunngortikkut mittarfikkut mikkiartuleraangami aput meterinik arlalinnik portussusulik "iigaralugu" mittarpoq. Kitsaanik timmisartumik attaveqarneq Kulusumi tupinnaannartumik aperujussuarneranit peqquteqartumik kinguaattoorfiullunilu taamaatitsiinnarfiusarpoq.
Aput maanna ima portutigilersimavoq, mittarfiup illutaata meterinik arlalinnik portutigisup qaanut ingerlaannartoqarsinnaalluni.
– Mittarfiup tungaanut aqqut nalinginnaasoq aputaajarneqarunnaarpoq. Kulusup qeqertaani siornatigut taamarsuaq aputeqanngisaannarsimagunarpoq, taamak ilinniartitsisoq lars-Peter Sterling Sermitsiaq.gl-imut oqaluttuarpoq. Aaamma assit Lars-Peter Sterling-ip assilisarai.
– Air Greenlandip sillimaniarnermut tunngatillugu timmisartuussinerit unitsikkallarmagit paasinarluarpoq. Tamatumunngalu peqqutaasoq tassaavoq, aputit mittarfiup sinaani nivannermit piiakkat qanippallaarlutillu portuallaalersimammata, taamalu minniarnermi sangusuuallanneq minnerpaarluunniit ajunaarnermik kinguneqarsinnaalluni. Kalaallit Nunaanni Mittarfeqarfiit ajornartorsiummi matumani atuuffia takuniartariaqarluinnarpoq, tassami mittarfeqarfimmi pisortat nikerartut tamarmik oqaatigiuartarsimavaat, ilaatigut aputaajaatit pisoqaasut, nungullartut naammanngitsullu. Mittarfik tallineqarlunilu silissiallatsinneqaqqammerpoq, qujanaqaaq, kisianni atortut kingoraartissallu atorneqarnerannut sanilliullugu angummassinnaanngippata tamanna sumut iluaqutaassagami.
– Mittarfimmi sulisut isoriniarneqarsinnaanngilluinnarput. Taakkumi atortut pisoqqat pisoqalisimasullu atorlugit ulloq unnuarlu sulipput, Lars-Peter Sterling oqarpoq.