Filmiliortartoq suliassanngortinneqassanngilaq
Filmiliortartoq Qaanaami imerajussuseq pillugu oqaaseqarsimanini pillugu politiinut suliassanngortinneqartoq unnerluutigineqassanngilaq.
Filmiliornermi ilitsersuisartoq siorna ukiukkut Otto Ignatiussen aamma Rikke Spork peqatigalugit Qaanaamiippoq, meeqqannut sammisaqartitsillutik. Filmiliornermi ilitsersuisartoq Danmarkimut angerlamut uteqqammerluni oqaaseqaateqarpoq, Qaanaami imerajussutsip kingunerisaat amiilaarnartuusut.
Oqaaseqaatai oqallinnermik annertuumik pilersitsipput inuillu oqaatsinit ajuallatsinneqartutut misigisimallutik. Tamakkulu tamarmik politiinut suliassanngortitsinermik kinguneqarlutik.
– Maannalu ukioq ataasingajaq qaangiuttorlu suliaq matuneqarpoq. Politiit unnerluussissutit tamaasa misissorsimavaat, Karen Littauerimut suliniummullu tamarmiusumut, taamalu suliami unnerluussinissamut tunngavissaqanngitsoq nalilerlugu, unnerluutigineqartup eqqartuussissuserisua Lulla Forchhammer tusagassiorfinnut nalunaarummi allappoq.