Bakteria ulorianartoq anigorpaa
Arnaq Maniitsumiittoq bakterissamik akiuussutissanut akiuussinnaasumik eqqorneqartoq maanna peqqissivoq. Ilaqutaasa sinneri bakterissamit ulorianartumit taassuminnga tunillatsissimanngillat, Maniitsumi nakorsaaneq Hans Johnsen Sermitsiaq.gl-imut paasissutissiivoq.
– Ilaqutariit tamaasa maanna qinngortarsimalereerpagut, taamalu paasivarput, ilaqutariit sinneri bakterissamik akiussutissanut akiuussinnaasumik ulorianartumik MRSA-mik tunillatsissimanngitsoq, Hans Johnsen.
Arnaq sakissamigut aseruuttoornerminik nakorsarneqartillugu bakteriamik akiuussutsissanut akiuussinnaasumik ulorianartumik MRSA-mik eqqorneqarsimasoq paasineqarpoq, tamannalu arnaananngorlaanik arlalinnik eqquisarpoq.
– Maanna arnaq aseruuttoornerlu pineqartoq misissoreersimalerpagut, paasivarpullu MRSA-mut malunnaataasinnaasunik peerussimasoq, Hans Johsen oqarpoq.
Taanna Sermitsiamit sapaatip akunnerani kingullermi apersorneqarluni oqarpoq, bakteria ulorianartoq taanna HIV-mit ulorianarnerungajattoq.
Kisianni taamatut oqaaseqarnera kinguneqarnerlussimavoq, tassa ilaqutariit eqqorneqartut sisamanik meerartallit ilaquttaminnit inissisimaffigisaminnit anitaasimallutik.
– Taamatut pisoqarsimanera assorujussuaq ajuusaarutigaara. Erseqqissassavaralu ilaqutariit pineqartut avatangiisiminnut NAVIANARTORSIORTITSINNGIMMATA. MRSA-mik tunillatsissimanngillat, Hans Johnsen oqarpoq.
Nakorsaq Kent Kleinschmidt nakorsatut immikkut tassunga ilisimasaliusoq Sermitsiaq.gl-imut uppernarsaavoq, Maniitsumi Sisimiunilu ilaqutaasut misissoreernerisa kingorna paasineqartoq, MRSA-mik allanik tunillatsittoqarsimanngitsoq.
– Uanga Hans Johnsenip oqarneratuut ilisimatitsissutigisinnaavara, ilaqutariit pineqartut avatangiisiminnut navianaataanngimmata, Kent Kleinschmidt oqarpoq.