Sisimiuni akiligassat tuparujussuaataasut

Kisianni akiligassat eqqortumik naatsorsugaapput, inissiaatileqatigiit INI A/S aalajangersaavoq.

Beboere i blok 5 Sisimiut holdt en demonstration for de høje varme-regninger.

– 2006-imi ukioq naallugu katillugit 8.752 kronenik akiliisimavugut. Maanna naatsorsorsinnaalerparput, ukioq manna 21.267 kronenik akiliisussanngorluta. Ilumoorsinnaanngilaq, issitsillugu kiassaatittaluunniit ini tamaat kissatsissinnaanngittarmagu, kissartoq kissarnikinnermik, taamak Sisimiuni Aqqartarfimmi blok 5-imi najugaqartut ilaat Tabitha Olsen Jensen Sermitsiaq.gl-imut oqarpoq.

Najugaqartut ataasinngornermi apriilip 7-iani akerliussutsimik takutitsipput, regningillu tamaasa naqqa tikillugu misissorneqarnissaat piumasaralugu. Utoqqalinersiutillit siusinaartumillu utoqqalinersiallit arlallit bankimi kontuminni tigusinnaasatik sipporlugit tigusereersimalerput. Kisianni regningit eqqortumik naatsorsuusiorneqarsimapput, INI A/S erseqqissaavoq.

– Regningit misissoqqissaartissimallugillu kingornagut aatsaaqqaaniit kukkuneqarnersut misissortissimallugit. Regningit eqqortumik naatsorsugaapput,INI A/S-imi kontroløri Erik Jensen aamma aningaasaqarnermut pisortaq Jukku Mølgaard Sermitsiaq.gl-imut oqarput.

– Nukissiorfiit-ni akinik qaffaasoqarsimavoq, kilowatt-tiimimut ataatsimut aki 2006-imi 517 kr.-iniit 2007-mi 560 kr.-inut qaffassimammata. Qaffaat 8,3 procentiuvoq, taannalu qaffaat blokimi taaneqartumik ataatsimut katillugu 300.000 kr.-inut qaffaataasimalluni, Erik Jensen aamma Jukku Mølgaard oqarput.

– Aamma 2006-ip naanerani atuinerup ataatsimut katinnera naatsorsuusiorfigineqarsimanngilaq, tamannalu ineqartunut utertoortitsingaatsiarnermik kinguneqarsimalluni. Maanna 2006-imut 2007-imullu naatsorsuusiortoqarsimalerpoq, taannalu blokimut tamarmiusumut 400.000 kr.inik amerlanerusunik akiliuteqarnerunissamik kinguneqarsimalluni. Taamalu 2006 aamma 2007 tamaasa naatsorsuusioraanni kisitsisit imminnut naligiilerput, INI A/S paasissutissiivoq.

– Nassuerutigissavarput ineqartunut paasissutissiisarnermut pitsaavallaarsimanngimmat. Taamaattumik ineqartut tamaasa majimi ilisimatsitsinertalimmik ataatsimiigiarnissaannut aggersarsimavagut, suliarlu manna sukumiisumik nassuiaateqarfigalugu.

– Maannakkut aamma ineqartut akiligassat qaffaataannik naafferaartumik akilersuisinnaanissaannik periarfissippagut, taamaalilluni akiligassat piffissaq sivisunerusoq atorlugu akilersorneqarsinnaassammata, Erik Jensen aamma Jukku Mølgaard oqarput.

Powered by Labrador CMS