Psykilogit psykiloginut inatsit ujartorpaat
Kikkut tamarmik "psykologitut" imminnut taasinnaammata sullitat takusinnaanngilaat qulaajaaffigineqarnertik katsorsarneqarnertillu ileqqorissutsikkut suliatigullu illersorsinnaasumik ingerlanneqarnersoq.
Dansk Psykolog Foreningip Nuummi Kalaallit Nunaanni Kredsia ukiumoortumik ataatsimiissimavoq, kredsip ilaasortaanit 35-init tamangajannik peqataaffigineqartumik.
Dansk Psykolog Foreningip kandidatit cand.psych.-itut imaluunniit cand.pæd.psych.-tut ilinniagaqarsimasut ilaasortanngortittarpai. Danmarkimi kandidatit taamatut ilinniagaqarnermik tunuliaqutallit kisimik psykologitut taasinnaapput, Kalaallit Nunaanni taaguut taanna illersorneqanngitsoq. Tassa imaappoq, allamik ilinniagaqarsimalluni taamattut sulisoq imminut psykologimik taasinnaavoq, inatsisitigut ileqqorissutsikkullu malittarisassanik atugaqartinneqarani, tamanna psykologitut sulinermi tunngavissatut pingaaruteqarluinnaraluartoq.
Psykologit kredsianni ilaasortat ernumanartoqartippaat taaguutip Kalaallit Nunaanni illersorneqannginnera. Kikkut tamarmik "psykologitut" imminnut taasinnaammata sullitat periarfissaqanngillat paasissallugu qulaajaaffigineqarnertik katsorsarneqarnertillu ileqqorissutsikkut suliatigullu illersorsinnaasumik ingerlanneqarnersoq. Ajornerpaaffimmigut sullitat katsorsaariaatsinik akuerineqanngitsunik ajoquserneqarsinnaapput, katsorsartinnerup maalaarutiginissaanut periarfissaqaratik. Sullitallu ajornartorsiutinik itisuunik ajornakusoortunillu katsorsartikulasarmata pingaaruteqarpoq katsorsaanerup suliatigut ileqqorissutsikkullu illersorsinnaasumk pisarnissaa.
Qulaajaaffiginninnerit katsorsaanerillu psykologitut ilinniarsimasut atortagaat, tunngaveqarput psykologitut sulinermi ilisimasanik annertuunik, amerlaqisutigut katsorsaariaatsinik ilisimatusarnermik tunngavilinnik, qulaajaariaatsinik akuerineqartuniik, assersuutigalugu tarnip pissusianik misilitsinnertigut, minnerunngitsumillu pitsaassutsimik meqqilinnik, ataavartumik psykologit allat ikiorsiisarnerisigut. Psykologitut ilinniarsimasut ataavartumik psykologip iluani ineriartornermik paasissutissinneqartarput Dansk Psykologforeningip atuagassiaatigut Dansk Psykolog Nyt-ikkut. Peqatigiiffik psykologitut sulinermi immikkut pikkorissarnerpassuarnik neqerooruteqartarpoq, tamatumani ilinniartitsisut atuartitsissumminnik misilittagaqarluarlutillu immikkut ilisimasaqartuusarlutik. Pyskologit ilinniarsimasut ileqqorissutsikkut malittarisassanik atugassaqartinneqarput, tamakkunatigut siunertarineqarluni sullisat psykoligillu pisariaqartitaat.
Psykologit kredsiata ujartorpaa psykologinut inatsit, psykologit sullitallu soqutigisaannik qularnaarisoq.
"Imminorneq imminornissamillu sioorasaarineq" suiassaqarfik nutaaq
Kredsip ataatsimiinnerani pissutsit, sinerissami tamarmi psykologit misigisimasaat tunuliaqutaralugit akuersissutigineqarpoq sammisaq "imminorneq imminornissamillu sioorasaarineq" ukiuni aggersuni sulinermi sammineqassasoq. Taamaasilluni suleqatigiissitamik pilersitsisoqarpoq sulinermi taaguutigalugu "Imminornissamik ulorianartorsiortut", aappaagulu psykologit pikkorissarnerini qitiusumik sammineqartassapput imminornissamk ulorianartorsiortut, qimatat ilaqutaasullu.
Ataatsimiinnermi psykologit akissarsiaat sulinermilu atugassarisaat sammineqarput. Psykologinik, Kalaallit Nunaanni suli amigaatigineqartunik, tikisitsisinnaassagaanni attassiinnassagaannilu, akissarsiatigut atugassanik, minnerpaamik qallunaat atugassaattut pitsaatitigisunik, neqerooruteqartoqartariaqarpoq. Aamma ilanngullugu ajornartorsiutaavoq sinerissami psykologit pisariaqartumik nakkutigineqarnissamut periarfissaqannginnerat - nakkutigineqarnerlu periusaavoq psykologit suleriaasiisa pitsaassusaasa qulakkeernissaanut qulakkeersinnaallugulu psykologip nakkaattuuinnginnissaa. Taamaattumik Kalaallit Nunaanni tamarmi psykologit nakkutigineqarnissaannut periutsinik aningaasatigullu periarfissanik pilersitsioqartariaqarpoq.
Ataatsimiineq sioqqullugu psykologinut pikkorissartitsinerit marluk, immikkut ilisimasalittut akuersissutigineqartut ingerlanneqarput, pikkorissarnerillu taakkua marluk peqataaffigineqarluarsimapput. Pikkorissarnerup aappaani sammineqarput sianiutinut tunngassuateqartut, pikkorissarnerup aappaani sammineqarlutik nakkutigineqarneq sulianilul sammisallit allat. Pikkorissarnerit tassaapput psykologinik ataavartumik ilinniartitseqqittarnerit.
Dansk Psykolog Foreningenip Grønlandskredsiani siulersuisut imaapput:
Siulittaasoq Karen Marie Nathansen
Siulittaasp tullia Ida Andersen
ASG-mit aallartitaq Jonna Ketwa
Aningaaserisoq Annette Broberg
aamma sinerissamit sinniiisoq Susan Hornbøll.