Qaqortumi naluttarfik kulturimullu illu

Qaqortup Kommunia Lokale- og Anlægsfondilu kulturmut illup imermik allaaveqartup titartarneqarnissaanut illussanik titartaasartunik unammisitsinissamut qaaqqusipput.

Pilersaarutit malillugit kulturikkut illutaassaq imertalik timersortarfimmut nutartikkamut(talerpiatungaani) atatinneqassaaq, højskoli (saamiatungaani), arsaattarfik illoqarfimmilu sukisaarsartarfiit inissinneqassaaq.

Qaqortormiut aggustimi illussanik titartaasartut unammisinneqarnerini ajugaasumik saqqummiiffigineqarumaarput, suliassami ilaassallutik naluttarfik, kulturimut illu timersortarfillu nutartigaq.

Illussanik titartaasartut unamminerannissaat kulturmut illu imermik aallaaveqartup timersortarfimmut atasussamut pilersaarusiornerat Københavnimi ataatsimiinnermi isumaqatigiissutigineqarpoq, peqataallutik borgmester Simon Simonsen Kommuneqarfimmi pisortaq Jørgen Vetterlain aamma Lokale- og Anlægsfonden Tips og Lotto-miit aningaasalersorneqartoq.

Lokale- og Anlægsfondip siornatigut Kalaallit Nunaanni sanaartukkat arlallit tapiiffigisarnikuuvai, taakku ilagaat Nuummi naluttarfik Maik.

Aningaasaateqarfiup taasuma timersortarfitoqqat naleqqukkunnaarnikut nutartetarnissaat atuisunullu nutaanut naleqqussartarnissaat isumagisarivaa.

-Timersortarfittalu iluamik nutarterneqarnissaa pisariaqarluinarmat, 2006-imi aningaasaateqarfik Lokale- og Anlægsfonden attaveqarfigaarput, oqarpoq Simon Simonsen Sermitsiamut.

Katerisamartarfik pisoqarfiulluartoq

Pilersaarutaavoq immermik aallaavearluni illu kultureqarfik timersortarfimmut atatillugu sananeqassasoq, højskole, arsaattarfik illoqarfimmilu sukisaarsarfiusartut qanillugit.

Kommuunip neriuutigivaa illoqarfiup immikkoortua taanna tassaasasoq timersornikkut kulturikkullu nukkassarfiussasoq, inuinnarnit timigissariartunit, timersortartullu nuimasunit, kulturikkullu suliniuteqartunit atorneqartassalluni.

-Qaqortoq aamma illorqarfiuvoq inuusuttorpassuarnik ilinniartorpassualik, taakkualu pitsaanerpaanik periarfissaqartinniarpagut, oqarpoq Simon Simonsen.

Illussanik titartaasartut unammineranni peqataasut naluttarfissamut spabad-ertalimmut sauna-talimmullu siunnersuuteqassapput.

Atisanik taarsiisarfeqarfiit nutaat cafeterialu nutaaq sanaartornermi ilaassapput, takkualu timersortarfik atueqatigisinnaanngorlugu pilersinneqassallutik.

Kulturi nutaanik periarfissaqalerumaarpoq, ilaatigut filmertarfik, isiginnaartitsisarfik nipilersortunillu tusarnaartitsifiusinnaasoq, init sungiusartarfiit filmiliortunut isiginnaarutissianut nipilersornernullu sulliveqarfissat.

Siunnersuut ajugaasoq

Kulturikkut illu imermik allaavilik timersortarfimmut nutartikkamut atasoq 100 mlliuunit missaannik akilik.

Pilersitassaq taama annertutigisoq Qaqortup kisimi nammassinnaanngilaa, taamaatumik aningaasaateqarfiit suleqatigisassallu tapiissuteqarnissaannik qinnuteqarfigaagut, oqarpoq Simon Simonsen.

Siunnersuisut ajugaasut pilersaarusiaat kusanartoq takutitassaralugu, neriuppoq peqqutissat tunngavissaqarluartut piareersimatissallugit.

Qaqortumi kommunalbestyrelsip tamakkerlutik kulturip illussaa taanna tapersersorpaat, 2008-milu illussanik titartaasartunik unammisitsinermut aningaasartuutissat 1,5 mio. kruunit immikkoortillugit.

Qaqortup kommuuniata unammisitsinermi Akademisk Arkitektforeningi ingeniørillu sanaartornermilu siunnersuisorqarfiat NIRAS suleqatigai.

Borgmester Simon Simonsenip illussanik titartaasarfeqarfiit tallimat unamminissamut qaaqqujumavai, ingerlatsiveqarfiillu kalaalinik ilaasorqartut salliutikkumallugit.

Unamminermi siunnersuutit Qaqortumi nalilersorneqassapput, innuttaasullu tamarmik aggustimi siunnersuutit takunissaannut periarfissaqarumaarput.

Qaqortumi illup kulturisiorfiup imertalliup atoqqaarfissiorneqarnissaanut piffissaliinissamut sanaatornerup aningaasalersornissaanut tunngasut inissppata aatsaat ullulerneqarumaarpoq.

Powered by Labrador CMS