Ikerasammi katittut
Ilinniartitsisut aappariit tupermi kiassarneqanngitsumi unnuipput.
Ikerasammi Ummannap kommuneani nunaqarfiit annersaanni arfininngormat ulapaarfiusimaqaaq. Ikerasak aamma nissebandikkut nunqarfiattut ilisimaneqarpoq, juullimut ammartagaq nuannarineqarluartoq tamaani immiunneqarnikuuvoq. Isiginnaartitsisartoq Flemming Jensen halvfjersikkut qiteqqunneranni ukiuni marlussunni ilinniartitsisuusimavoq, tassaniinnerminilu juullimut ammartagaliornissaq arlalinnillu atuakkiornissamut isumassarsiorsimavoq.
Nissebande-mi filmimi qallunaat aappariit katitinneqarput, kisianni Ikerasaap oqaluttuarisaanerani arfininngormat siullerpaamik ilumoortumik taamatut katittoqarpoq. Katittut tassaapput ilinniartitsisut aappariit nuannarineqarluartut Betina aamma Thomas Stegø-Bak, ukiut sisamassaa nunaqarfimmi najugaqartut, aammalu Flemming Jensenip illugisimasarpiaani illoqartut.
Nunaqarfimmiunut tamanut kaffillereeramik katerlaat qimussimik aallarput, taamalu 22-nik issittoq qamutini tupilikkami kiassarneqanngitsumik unnuillutik.
Maanna Ikerasammiut pissanngallutik utaqqilerpaat, immap sikuani katinnerup unnuaa kinguaassiffiulluarsimanersoq...