Narsarsuaq ukiukkut matuniarnagu akitsuipput

Narsarsuup Københavnillu akornanni imarpik qulaallugu Air Greenlandip timmisartuussisarnera maannakkutut isikkoqartillugu amigartoorfiuvoq, taamaammallu timmisartuussivik taanna Kangerlussuaq-København-imut uiggiullugu ingerlanneqarnera aningaasarsiornikkut tunngaveqarnera suliffeqarfiup nalileqqittariaqarsimavaa.

Tamatuma kingunerisaanik Narsarsuup Københavnillu akornanni sapaatit akunnikkaartumik timmisartuussisarnermi 2. april 2008 atuutilersumik akinik qaffaaneqassaaq.

Bilitsit allanngortinneqarsinnaasut, qorsuit, siumuinnaq 1200 kr.-nik akitsorneqassapput, bilitsillu allanngortinneqarsinnaanngitsut, aappaluttut, siumuinnaq 750 kr.-nik akitsorneqassallutik.

Timmisartuussivik ilaasoqarnikkut killeqartumik tunngaveqarpoq, tamatumalu saniatigut Narsarsuarmi silap pissusaanik peqquteqartumik akuttunngitsumik akisuunik taamaatitsiinnartoqartarpoq, kinguaattoorneqartarluni mittarfinnullu allanut ingerlatitsiinnartoqartarluni. Tamakku soorunami timmisartuussiviup ingerlanneqarneranut aningaasartuutinik amerlasuunik pilersitsisuupput.

Maanna akit qaffannissaannut ilimasaarutaasunut taarsiunneqarsinnaavoq timmisartuussisarnerit aasaanerinnaanut, imminut akilersinnaaffiannut, killilerneqarnissaat, kisiannili Air Greenlandip Kujtaata sullinneqarnera aningaasarsiornikkut akuerineqarsinnaasumik pitsaanerpaamik ingerlatiinnarnissaa suli kissaatigimmagu, taarsiullugu angalanerit akiisa qaffannissaat aalajangiuppaa, taamaalilluni timmisartuussivik timmisartuussivinnit allanit aningaasatigut tapiiffigineqartarunnaassalluni.

Aaqqiissutissatut aalajangerniarnermi Air Greenlandip Kujtaani soqutigisaqartuusut oqaloqatigisimavai, ilaatigut taqqavani borgmesterit, taakkullu taama aalajangernermut paasinnilluarput, pingaartumik ukiuunerani matusinissamut taarsiunneqarnissaagalua eqqarsaatigigaanni.