Kræftimut aningaasaateqarfik pilersinneqarpoq
Kræftimik nappaatilinnut iluaqutaasinnaasumik aningaasaateqarfik aallartinneqarpoq 300.000 kr.-ingajannik imaqareerluni.
Ukiut marlungajaat qaangiupput Nanortalimmi kræfteqarsorisanut misissuinermi pitsaannguutaasinnaasumik pilersitsinarluni suleqatigiissitamik pilersitsisoqarmat.
Suleqatigiissitap aningaasanik katersuiniarneratigut Nanortallip napparsimavia aassiuinermi atortorissaarummik pilerneqarpoq 250.000 kronit sinnilaarlugit akilimmik, Nanortalimmi borgmesteriusimasoq kræftemillu nappaateqarsimasoq Nikolaj Ludvigsen ilisimatitsivoq.
Taamaalilluni aassiuinermi inernerit Danmarkimut nassiutinngikkaluarlugit sukkanerusumik takuneqarsinnaalerput.
Katersuiniarnermi katersat suli 275.000 kr.-ni sinneqarput, taakkulu aningaasaateqarfiliornermi aallaqqaatigineqarput. Sumorpiarli atorneqassanersoq suleqatigiissitat suli naluaat.
- Suleqatigiisitat qaammatini kingullerni malinnaaffigaarput nappaammik kræftimik eqqugaasimasut ilaqutaasalu nappaatip takkunnerani ingerlaneranilu ajornartorsiutit imaannaanngitsut qallormatigit. Aallartinniagarput suli ilusilersunngilarput taamaasiorusullutali aatsaat tutsiuttutigut isumassat aallavigalugit ingerlaqqeriarusulluta, Nikolaj Ludvigsen allappoq.