Nuummi immikkoortoq immiaaraqarfiunngitsoq
Nuup qeqqani immikkoortumi immiaarartorfioqqusaanngitsumi immiaarartorneq pingasunngorneq februaarip 20-ianiit pillaammik akiliisitaanermik kinguneqarsinnaavoq. Paasissutissiissut taanna maanna Nuuk Ugeaviisikkut Nuup TV-atigullu siammarterneqarpoq.
Nuummi kommunalbestyrelsep siorna novembarimi aalajangerpaa, Nuup qeqqata ilaa aalajangersimasoq immiaarartorfioqqusaajunnaassasoq. Aalajangersagaq taanna pingasunngorneq februaarip 20-ianiit atuutilerpoq, tamaani arlalilluni allagartat nivinngaassorneqarsimallutik.
Nuup qeqqani niuerniat taamaalillutik Brugsenip silataaniikkajunnerusut - pingaartumik qaammammusisut ullullu 14-ikkaarlugit akissarsisut nalaanni takussaanerulersartut - takussaartussanngussavaat. Taamaakkaluartoq sumiiffimmi immiaarartorfioqqusaanngitsumi ataasitornissamut ussernartorsiorneq annertuallaalerluni ataaseq simeeriarlugu najorsigaanni immiaaraq akisunaarneqariaannaavoq.
– Aalajangersagaq taanna unioqqutinneqassagaluarpat politiit pillaammik atiliisitsisinnaapput. Politiit aamma malittarisassaq taanna atorlugu inuit sumiiffimmi pineqartumiit peersissinnaalerpaat, taamak Ana Geo Nuup Kommuneani Teknikkeqarfimmeersoq Sermitsiaq.gl-imut oqarpoq.
Immikkoortup immiaarartorfioqqusaanngitsup assinga talerpimmi toorukku takusinnaavat.