Atorfillit oqaatsinut politikkimik ujartuipput

Namminersornerullutik Oqartussat sulisutik kalaallisut ilinniarsinnaasut ilinniarusuttullu ilinniartissallugit soqutiginerpaat? Pisortani ilinniagartuut kattuffii taama aperaat.

Kalaallisut oqaluttarpit? Ajoraluartumik naamik.

DJØF-ip (inatsisilerituut aningaasarsiornermillu ilinniagartuut) ataatsimoortumik klubbiata ASG-llu (ilinniagartuut allat) paasiuminaatsippaat Namminersornerullutik Oqartussat sulisumik kalaallisut pikkorissartinnissaat pingaartinngimmassuk.

- Siumutp Atassutillu naalakkersuisooqatigiinnissamik isumaqatigiissutaanni, qulequttap ”ataatsimoorullugu akisussaaffik suleqatigiinnerlu” ataani allassimavoq Naalakkersuisut kalaallit oqaasii pillugit ersseqqarissumik politikkiliorniartut kalaallillu oqaasiisa pisortat allaffeqarfiini atorneqarnerat pillugu ersseqqarissunik najoqqutassiorniartut.

- Naalakkersuisooqatigiinnissamik isumaqatigiissut naapertorlugu sulisorisat kalaallisut oqaasiliunngitsut kalaallit oqaasiinik ilinniar-tinneqarnissaannut tamanna neqeroorutaavoq. Tamanna qaqugu aallartissagami, illinniagartuut sinniisaat allapput.

- Amerlanersatta atorfiit kalaallit oqaasiinik ilisimasaqarnissamik iluaquteqarfiusussat qinnutigisarpaat, kisianni ikinnerusut amerlagaluartugut suliarput aqqutigalugu kalaallisut ilinniartinneqarnissatsinnik neqeroorfigineqarsimavugut. Tassa ima paasisariaqarnerpa tamanna taamaallaat atorfininnermorpiaq atatillugu iluaqutaassasoq, atorfinereersimagaanni pingaarpallaanngitsoq? Tamatuma aperisariaqalersippaatigut: Namminersornerullutik Oqartussat sulisutik kalaallisut ilinniarsinnaasut ilinniarusuttullu ilinniartissallugit soqutiginerpaat?

Kalaallisut ilinniarnissamut periarfissat taagorneqartut assigiinngissuteqartitertut, ilinniagartuut peqatigiiffii allapput.

Namminersornerullutik Oqartussat suliffiini pikkorissaasarnerit 2007-imi ataasiaannarluni ingerlanneqartut, aamma Oqaatsinik Ilinniarfimmi ilungersuullugu pikkorissaasarnerit Namminersornerullutik Oqartussanit ingerlanneqarlutillu akilerneqartarput, taavali ASG’p pikkorissaasarneri sulisut suliffiata avataani pisarlutik, atuagartaat sulisut namminneq akilertarlugit pikkorissarnertaallu ASG’mit akilerneqartarlutik, taanna Danmarkimi ilinniagartuut kattuffiinit aningaasanik pisarmat.

- Qassit kalaallisut pikkorissarnissaq ilumut soqutigineraat, qassit pikkorissartarnersut imaluunniit qassit itigartitaasarnersut kisitsisinngorlugit ilisimaneqanngillat, kisianni DJØF-ip ataatsimoortumik klubbiani ASG-milu ilaasortat akornanni paasiniaamisaarneqarmat pasitaanneqarpoq Oqaatsinik Ilinniarfiup ilungersuullugu pikkorissartitsisarneri peqataaffigiartorneqarsinnaasaraangamik nersua-laarneqartartut. Pikkorissarnermut akiliut, angalaneq ullormusiallu aningaasarpassuarnik naleqartarput, aammalumi pisortaqarfiup suliffeqarfiulluunniit sulisortik sap. akunnerini marlunni amigaatigisariaqartarpaat.

- Sulisut Namminersornerullutik Oqartussat pikkorissartitsinerini ilaassagunik sap. akunnerani ataatsimi suliffitsik qimassimasariaqartarpaat, apeqqutaavorli pikkorissartitsineq piviusunngortinneqas-sanersoq imaluunniit taamaatinneqassanersoq, Namminersornerullutik Oqartussat suliffiutimik iluini pikkorissartitsinissaralui allarpassuit pisarnerattut.

- Taava ASG’p pikkorissartitsisarneri nuannarineqaqisut kiserngorupput, tamakkuli sulisut ullormut sulinerata sivisuup avataatigut pisarput, ilaasortallu tamakkunani pikkorissartut ASG’p akiliuttarpai, sulisup nammineq atuakkat akilertarlugit. Pikkorissartitsisarnerit tamakku pilerigineqangaarmata peqataaniarlutik utaqqisut arlalissuupput. Ilumut tassa kalaallisut ilinniartinneqarnissaq sulisut kattuffiisa isumagisassarinerpaat, uffa suliffiup nalaani ilinniaqqittut annerusumillu ilinniartinneqartut suliffimmit akiliunneqartartut, DJØF-ip ataatsimoortumik klubbia ASG-lu sinnerlugit allappoq Louise Amkær.

Namminersornerullutik Oqartussani kommuninilu DJØF-imi ilaasortat 150 missigaat ilinniagartuullu allat ASG-mi ilaasortaasut 200 missiliorlugit.

Powered by Labrador CMS