Nannut qaninngoortalerput
Qaanaami eqqaanilu piniartut nannut amerligaluttuinnartut inulinnut qinilliartuinnarnerat ernumanartoqartippaat, nannut inunnut navianartorsiortitsisinnaammata.
Qaarngaaq Nielsen Qaanaap nunaqarfiani Savissivimmiu KNR-imi oqaluttuarpoq, nannut amerligaluttuinnartut nunaqarfimmut qaninngoortalersut.
- Aamma assorsuaq qinngarnarpoq aallaaneqarsinnaanngimmataluunniit, piniartoq Qaarngaaq Nielsen Savissivimmiit oqarpoq.
Taanna isumaqarpoq, nannut amiinik kigutaannillu avammut qanittukkut nioqquteqaqqusaajunnaarsitsineq pisariaqanngitsumik piniartunik eqquinerusoq.
- Nannut piniartunut aningaasatigut isertitsilluaataasarpoq. Taamaattumik neriuutigaara maani nunami nannoqassuseq pillugu paasititsiniaanermik aallartitsisoqassasoq, tassami nanorpassuupput, Qaarngaaq Nielsen radioaviisimut oqarpoq.
Taanna oqaluttuarpoq, siorna taavani Qimusseriarsuarmi imartamilu Kane Basin-imi Ellesmere Islandip Kalaallit Nunaata akornaniittumi nannut 18-nit pisarineqartut.