Skip to main content

Sisimiut eqqaani nannut arlallit takuneqartut

Nannut arfinillit tikillugit Sisimiut eqqaani takuneqarsimapput, ilaat iloqarfimmut qanittumiittut.

Nannut Sisimiut eqqaani maannakkorpiaq angalaartut qasserpiaanersut iluamik ilisimaneqanngilaq. Kisianni Maria Aarup-ip qularutiginngilaa, Amerlup kangerluani marlunngornermi annut arlallit takusimagamigit. Aamma kilisaatiniit umiarsualiviup paavani sikumik aserorterisimasuniit nalungeqanngilaq, ikinnerpaamik nannut marluk Sisimiunut pulariaani qeqertaaqqani marlunni takuneqarsimasut.

- Ikinngutinnut Amerloq-mi ineqartumut kaffisoriartorpunga. Kangerlummi nanoqartoq pillugu SMS-isigami siullersaallunga qinngutit tiguakka, nannullumi erseqqilluinnartumi takuakka. Kingorna qinngutit tigoqqikkakkit angallatit aqqutaata pukoranneranit ersernerlulersimapput.

Sisamanngornermi ullaap-tungaani mittarfiup eqqaani nannunik takusoqaqqippoq, aammalu eqqaavissuup eqqaani sisoraatinik arpaffiit aqqutaannut ungasinngitsuni nannup tumai takuneqarsimapput.

Politeeqarfimmi pisortaq hans Falck Petersen naapertorlugu nannut arlaannaalluunniit inunnut qaninngoorsimanngillat, nannuttoqarsimananilu.

Kisianni illoqarfiup killingata iluani nannumik takugaanni politiinut nalunaarutigineqassaaq. Nannumik tassanngaannaq tassungaaraq naappattoorsigaanni inuunermillu navianartorsiortinneqalerluni, imaluunnit inummik nammumit saassunneqartumik takunnikkaanni aallaasinnaatitaapput, politiit oqarput.

Hans Falck Petersenip inuit alaatsinaaqqullugit kajumissaarpai. Nannut kaattut nalinginnaasumik nujuassuseeruttarput. Nannut nalinginnaasumik imarmiuupput, puisinik inuussuteqarlutik. Kisianni kaalersimagaangamik nunamiittuut suulluunniit neriniartarpaat.

Piniarnermut siunnersortip Otto Berthelsenip ilisimatitsissutigaa, nannut qulit Uummannamiit Nuuk tikillugu 2008-mi pisarineqarsinnaasutut pisassissutaasimasut. Sisimiuni piniartut arfinillit nannussinnaatitaanermut akuersissummik tunineqarsimapput.

Pisassiissutit nannumik Itillip eqqaani februaarip 1-iani aallaaneqartumik ilanngaqqaarneqarput.

Taakku eqqaassanngikkaanni kingullermik nannumik takusoqarpoq 2004-mi apriilip 1-iani, taamanikkut aamma nannuttarineqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER