Thulemi sulisut pineqarnertik suli sorsuutigaat
Thulemi sulisuusimasut timmisartorsuup qaartartorsuutip B-52-ip ukiut 40-t matuma siornagut nakkarneragut saliisimasut peqqissusaannut paasissutissat Danmarkip tunniukkumangiinnarsinnaanerai EF-imi eqqartuussisut qullersaasa aalajangissavaat.
Sulisuusimasunit 1.200-sunit ullumikkut taamaallaat 200-t inuupput. Sinneri toqukkut qimagussimapput, ilarpassui kræfteqaatinut radiop qinngornerinut navianartunut attuumatinneqarsinnaasunik peqquteqartumik, dr.dk allappoq.
Kisitsisilli taakku Knud Juel-imit Statens Institut for Folkesundhed-imeersumit assortorneqarput. Taassuma Sermitsiaq.gl-imut ilisimatitsissutigaa, Thulemi sulisut peqqissusiannut tunngasut 1986-imiilli misissugarisarsimallugit.
– inuit qassit toqusimanersut ullumikkorpiaq ilisimaneqanngilaq, kisianni ilimanarpoq 500-it missaanniissasoq, knud juel ilisimatitsivoq.
Thulemi sulisut suli piumasaraat, peqqissutsiminnut paasissutissat Danmarkip tunniutissagai, naak naalakkersuisuusartut nikittaattut suliaq 1995-imili matuneqartutut isigisaraluaraat.
Thulemi sulisut ukiorpassuarni angusaqaataanngitsumik sorsuutiginnissimasut suli tunniutiinnanngillat. Danmark paasissutissanik tunniusseqqullugu pinngitsaaliniarlugu suliaq EF-imi Eqqartuussiviit qullersaannut suliassangortippaat.
EU-mi parlamertip suliaq ukiut sisamat sinnerlugit malttarisimavaa. Jens-Peter Bonde Juni-bevægelse-meersoq isumaqarpoq, peqqissutsikkut misissortittarsimannginnerit Thulemit sulisunut annertuumik kingunerluutaasut.
- Inuuninni misigisanni aatsaat taamak aalassataatigisumik misigisaqarpunga, Jens-peter Bonde dr.dk-mut oqarpoq. nangipporlu:
- Ilami toqqutigaat. Paasisinnaanngilara Thulemi sulisut namminneq peqqissutsiminnut paasissutissaataat ukiumoortumillu misissortinnissaat isumagineqarnanilu Danmarkip tunniukkusinngimmagit. Naalagaaffiup inuit peqqissusaat pigisinnaanngilai.
Knr.gl naapertorlugu amerkamiut naalakkersuissui Thulemi sulisunut timmisartorsuup qaartartorsuutip 1968-imi januaarimi ajunaarnerata kingorna saliisimasunut taarsiissuteqarnissaminnut piereersimajuaannarsimapput. Taamaakkaluartoq qallunaat naalakkersuisui taarsiissuteqarnissamut qinnuteqaateqanngisaannarsimapput.
- Qallunaat naalakkersuisui taarsiissuteqarusussimanngillat, Kalaallit Nunaanni atom-inik sakkussianik peqarnera pillugu salluliorsimanertik pissutigalugu. Oqaatigineqarsimavoq Kalaallit Nunaanni atominik sakkussiaateqartoqanngitsoq, taavalu atomimik sakkussiaateqanngippat taava aamma atomimik ajutoortoqarsinnaanngilaq, atominillu ajutoortoqarsimanngippat taava ajoqusertoqarsimasinnaanngilat, taamaammallu taarsiivigineqarsinnaanngillat! knr.gl naapertorlugu Jens-Peter Bonde taamak oqarpoq.